介紹朋友做同事,隨時無friend做?!

by Karen C.

如果你公司有空缺,而你朋友又搵緊相關工作,你會唔會介紹佢入嚟自己公司做呢?又或者朋友要求你介紹,你又會唔會為佢做「媒人」呢?

好處:

-幫到朋友,提供多一個機會俾佢搵合適的工作。

-公司有真心朋友,遇上任何挫折或難題,都會有朋友明白你心情,又可以聽你「呻」;甚至有時可以拍膊頭請佢幫吓手。

-如果朋友做得好,有助公司得益,咁樣自己都有好處。



壞處:

朋友玩樂同工作時的態度可能差好遠,如果對方工作上做得唔好,公司可能會覺得你亂咁介紹人入嚟,遷怒於你。

-每人的工作方式唔同,工作時難免遇到某啲衝突,有機會影響同朋友之間的感情。

-可能會有其他同事喺你或你朋友面前講對方是非;你朋友可能會唔小心將你嘅私事講俾其他人知。

-如果有朝一日佢升職快過你,又或者係你head住佢,都有可能令友誼關係顯得尷尬,有沒有心理準備?

遇上呢個情況,你可以點做?



你可以:

1.無論係你主動介紹,還是朋友要求你介紹都好,你可以先了解對方點解要離開現職工作,又或者點解想做呢份工,等你可以衡量一下公司嘅空缺職位係咪適合對方。

2.介紹之前,應該將公司工作情況、有咩要求等等話俾朋友知,等佢可以諗清楚你公司係咪真係適合佢,或者係佢想要嘅工作。

3.如果朋友係呢份工作的合適人選,不妨幫忙介紹,但又唔需要向公司「極力推薦」,只需做一個「介紹人」的角色就可以。對方最後見唔見得成工,始終係公司的決定。


4.如果你係好了解對方,又或者曾經共事過,清楚知道對方的工作態度、能力,知道佢係人才,亦都不妨介紹一下。

5.如果對方係唔熟的朋友,你就毋須考慮那麼多了,介唔介紹都無乜所謂。

CG! Tips

要介紹朋友做同事唔係一件容易處理嘅事,甚至有一啲好朋友因為咁而反咗面。當然,如果對方表現良好,亦對自己有得益,但相反的話,你可能亦會受到牽連。另外,如果朋友成功加入公司,你哋又係咪可以做到公私分明?呢個角色唔易擔當,做得唔好除時會傷害你同朋友之間的感情。總之,做決定之前,都要將每一方面嘅可能性諗清楚,否則連朋友都可能無得做架!

 

LOAD MORE