拆解Playboy4大「玩嘢」招式!

By COSMO

有啲男生好鍾意「玩嘢」,如果呢啲壞男生額頭大大隻字寫住「Playboy」,等你認住佢個嘜頭,你話有幾好呢。唔想中招,睇下以下嘅忠告,避免被男生玩之餘,更令佢哋識得尊重你!

玩嘢第一招:「我哋只係朋友。」

招式:食lunch時搭晒你膊頭,又會喺WhatsApp同你講啲肉麻嘢,但之後又無實際行動。

佢諗緊乜:佢對你有好感,但唔想有做男朋友嘅責任。如果佢只會喺有其他人在場嘅時候先撩你,可能佢只係想利用你令其他女生覺得佢風趣。

點解決:下次佢撩你嘅時候,你講笑咁同佢講:「做咩呀?想做我男朋友?」佢可能會答no,但如果佢緊張起來,可能佢真係唔止想撩你咁簡單。無論如何,咁可以提醒佢要顧及你嘅感受。

玩嘢第二招:「我會打電話俾你。」

招式:你哋喺party中相遇,跳舞傾偈之後,佢問你攞電話,但成個星期都無聯絡你。

佢諗緊咩:好多男生問女生攞電話,係因為唔知點完場。你陪咗佢成晚,以呢種方式告別會顯得佢比較nice,之後打唔打俾你又係另一回事。

點解決:當你遇到心儀嘅男生,同佢傾一陣就好走,搵返你班friend,如果佢之後再搵返你,睇嚟佢真係對你有意思,佢問你攞電話,應該都真係想同你聯絡。

玩嘢第三招:飄飄忽忽

招式:佢「特登」路經你成日去開嗰間餐廳,同你扮偶遇,但喺學校/公司時就當你透明。

佢諗緊咩:佢唔想俾人覺得佢已經俾人mark住,可能怕班friend瘀佢,又或者想其他女生覺得佢仍然單身。佢雖然鍾意你,但佢仍然唔係好想擺明立場。

點解決:唔好黐埋去,直到佢喺人前改變對你嘅態度。千祈唔好俾佢牽着走,如果佢真係鍾意你,你忽冷忽熱嘅態度會逼到佢對你更積極。

玩嘢第四招:一腳踏兩船

招式:佢有另一半,但又對你有意思,甚至追你。

佢諗緊乜:佢就似個浪子,永遠唔想安定落嚟。佢唔尊重你同佢女朋友,亦唔顧你哋感受。佢唔係衰人,就一定係唔理解女生係有血有肉有感覺嘅人類。

點解決:黐住佢就等於承認自己只值得擁有半個(甚至更少)男朋友。要佢尊重你,你先要尊重自己。只要佢仍然同緊佢女朋友一齊,你都唔好黐埋去!去同單身嘅男生約會啦,就算佢同女友分咗手,並且發誓愛你,你都要提高警覺,睇清楚呢個容易見異思遷嘅人係咪真係有誠意。

LOAD MORE