見到佢心跳加速=愛上佢?

By COSMO

單身的你當然好想拍拖,而且最好係盡快搵到一個Mr.Right。好多女生對於自己嘅「理想男友」總有一張藍圖──Sporty、醒目、叻、有幽默感……但好多時候,嗰個表面毫不起眼嘅男生,後來卻變成你心愛嘅人。究竟吸引力係點樣嘅一回事?異性又喺咩時候先會相吸?

吸引力之迷

「走過佢身邊個心就不由自主地跳!」、「第一眼望佢,就好似觸電咁!」、「唔知點解,個腦成日都想住佢」……

你知已經被對方吸引,呢種令人神魂顛倒的感覺向來都好似一個謎,然而,並唔係每一個令你心如鹿撞的男生都可以turn out成為你嘅Mr.Right。點解呢?

鏡子理論:有專家相信,我哋特別容易俾一啲擁有自己否定的性格特質的人所吸引(例如:對愛情唔認真嘅人覺得玩玩吓的男生最有魅力、無自信嘅女生覺得一事無成的男生可愛),其實自己最討厭就係呢種性格!

Mr.Right頻道:每個女生心目中都有一個偵察Mr.Right的頻道,根據理想男友的藍圖,專門搜索一啲合條件嘅男生。但好多時候,我哋嘅頻道會出現程式錯誤,將你帶到一啲根本唔適合你嘅男生面前。

原因好簡單,因為我哋都無將要求同自己嘅條件配合同調校。試試幫自己逐項評分,然後列出理想男友條件並衡量其重要性。如果你俾自己嘅浪漫度只有一分,但卻希望男朋友可以有十分的浪漫,咁你就永遠遇唔上合心水嘅男生了,或者即使遇上,大家都唔會開心。

有Feel嗎?

你倆四目交投,然後你馬上面紅,手心冒汗;佢馬上擰轉面,然後傻笑。

咁就叫做有Feel?!

簡單講,遇上吸引你嘅人就會有心跳、冒汗、腳軟等生理反應,係因為荷爾蒙水平嘅改變,未必一定因為你已經「愛」上佢。呢啲反應其實同你差啲遇上交通意外時的生理反應相近!亦都因為你有咗以上嘅誤解,以為自己已經深深愛上對方,呢種心理因素會加劇你下次再撞到佢時的生理反應,令你覺得自己一直都諗住佢。所以,當你遇上一個令你心跳得厲害嘅男生時,唔好馬上下定論,不妨拎出自己嘅理想男友清單,同自我條件對照一下,然後如常地交往一陣子,多觀察後決定。

同病相憐 & 日久生情

面對失戀或喪失至親嘅傷心事,人會變得脆弱,渴望重新做人,呢個時候遇見同樣傷心嘅異性,好容易就愛上對方。如果你同佢合作做一個project,會令你更易愛上佢。因為喺呢段時間入面,你倆有共同嘅目的,感覺自然特別投契。所以,當客觀環境改變之後,大家的感情變淡都唔出奇。

所以,請大家唔好沉迷喺愛情嘅幻想之中,盲目相信觸電、心跳、一見鍾情呢啲無咩根據嘅所謂愛情準則。放開懷抱,睜大雙眼,保持自信同開朗,你的Mr.Right就會隨時出現。

LOAD MORE