唔傷男友自尊心的批評法!

By COSMO

令人盲目嘅熱戀期過後,你喺男友身上搵到越來越多唔順眼嘅地方,你想佢變得更好,所以你會出口批評佢,但對方唔一定收到你嘅好意。有時受到關係越親密嘅人批評,就會感到越唔自在,覺得對方講嘅嘢係錯,想男友接受你嘅意見,就要注意以下嘅重點:

首先要諗清楚你批評嘅動機,你會唔會係因為學業或工作上遇到挫折,所以將憤怒情緒發洩喺男友身上?定係佢嘅錯失令你諗起以前某一個賤格嘅ex,你怕案件重演,所以少少事都反應過敏?如果係咁,就請你唔好胡亂作出批評,搵返你嘅理性返嚟!

提出批評 Dos & Don'ts

要提出建設性嘅批評,態度同用詞最為重要。

Dos

-擇選合適嘅時間同場合,喺佢比較清閒、心情愉快舒暢嘅情況下提出。

-每次只提出一項批評,唔好谷埋幾個問題一次過爆發。

-對事不對人。

-使用正面嘅字眼。

-只談現在發生嘅事,唔好搵返千年前發生嘅嘢嚟講。

-了解清楚你感到不滿嘅原因。

-為對方留有自辯嘅空間,唔好得你講無佢講。

-保持冷靜,唔好太過激動。

-將事實同感受分開,唔好誇大事實嚟支持自己嘅論據。

-知道幾時收口,若對方已經知錯,就唔應該再糾纏落去,亦唔好講啲難聽嘅說話。

-願意原諒對方,俾對方改過嘅機會。

-如果對方願意改變,可以順便一齊諗出解決方法。

Don'ts

-以偏概全,例如同對方講:「你成日都乜乜乜……」或「你從來都無點點點……」或「你哋啲男人個個都係咁!」。

-人身攻擊,例如同對方講:「你真係好唔掂!」

-放大問題,將事情講得比實際情況壞。

-睇死對方,例如同對方講:「你以後都唔得架喇!」

-推卸責任,例如話:「如果唔係你咁做,件事就唔會搞成咁!」

-當正自己係心理醫生,同對方講:「我知你想點㗎!」

-直接呼喝對方的全名。

-將家人扯埋落水,例如話:「你呢啲性格似足你阿爸!」

-講出惡毒嘅詛咒。

-堅持要立刻將問題解決,唔俾雙方冷靜嘅機會。

LOAD MORE