擺脫單身必勝法

By COSMO

見到身邊朋友成雙成對,暑假又話要同男朋友去邊玩、去邊食飯,自己就孤孤伶伶一個留喺屋企煲劇,埋怨點解阿邊個咁嘅樣都有人要,某某有公主病都仲有咁多人追?唔好再自怨自艾喇,睇吓究竟點先可以搵返個男朋友,同你甜甜蜜蜜過暑假啦!

Step 1.重整你嘅愛情

唔好諗得太長遠:男生對於「恨嫁」嘅女生有一種天生嘅偵察能力,所以同男生初相識時,應將話題集中於現在(如興趣、開心事),而唔係將來。如果你同男生兩句唔埋就開始傾幾歲應該結婚、想生幾多個BB等話題,對方一定會俾你嚇親。年輕嘅你應該將拍拖同結婚兩個觀念分開,咁樣搵男友時就唔會有太大壓力,成功機會亦會大大提高。

時刻以最好狀態示人:搵男友應該好似搵工咁積極!即係無時無刻都要執到正,不斷自我增值,令自己成為搶手貨!由於你唔知自己幾時同喺邊會同你嘅Mr. Right邂逅,所以凡係有人嘅地方,你都要以最佳最靚嘅姿態示人,平日亦唔好成日困喺屋企,去體驗多啲新事物,咁先可以大大提高認識男生嘅機會,傾談時亦會有更多有趣嘅話題,唔會搭唔到嘴。

Step 2.留下好印象

唔好成日提起前度:同心儀男生初次約會時,無必要將你舊男友嘅事蹟攤出嚟講,你咁做可能覺得自己好坦誠,但男生一定唔受落。如果你嘅ex好正,對方會覺得自己配唔起你;相反如果你勁踩個ex,對方又會覺得:「嘩,同你拍拖散咗,你會唔會又咁講我?」所以談論舊男友係約會初期嘅一大禁忌。

切勿神經質:想男生同你有進一步發展,你必須保持情緒穩定、心情開朗。若果你喺約會初期表現得神經質,成日都好驚見唔到佢,又或者對方遲咗覆電話你就發晒脾氣,一定會嚇親對方,令男生覺得同你一齊好困身。所以即使係約會初期,你都要俾多啲私人空間佢。當男生發現同你一齊仍然可以同friend打波,唔會失去太多自由,就會願意同你繼續發展。

Step 3. 約會策略

你有你生活:當你哋約會咗一段時間,開始認真對待雙方嘅關係時,不妨清楚俾佢知道你鍾意佢,不過要記住唔好成塊貼身膏藥咁黐到佢實一實。佢call過你,你唔使等佢打多次嚟,你大可以主動call返佢。千萬唔好將自己嘅社交生活規限喺二人世界入面。周末晚上不妨約friend睇吓戲,同屋企人食飯,俾自己保留一啲私人空間。俾佢知道,你有佢當然快樂,但佢並唔係你生活嘅全部。

唔好雞啄唔斷:當你同佢單獨約會時,當然有好多嘢想同佢分享。不過千萬唔好將你覺得有趣嘅所有故事一次過傾巢而出,而且同一句說話重複講十次,咁做會令鍾意說話精簡嘅男生頂唔順。每次約會,女生應該挑選兩三件有趣嘅事嚟講,講唔晒就留返下一次。另外,亦唔好只顧講你自己,係咁我我我,咁自我中心嘅人,一啲都唔可愛。

Step 4. 做返自己

隨和啲:好多男生都頂唔順扮cool扮高竇嘅女生,惡形惡相嘅女生,會令男生唔敢接近。當男生幫你開門,或提出幫你拎住袋嘢,請你欣然接受並且作出友善嘅回應。懶客氣懶拘謹,對方唔會覺得你有禮貌,反而認為你扮cute,因而唔想再搵你。

人不可以貌相:唔好因為見到佢靚仔同fit到爆嘅身型就嗒晒糖,觀察一下佢嘅其他方面,有無咩優點真正吸引到你﹖佢同媽媽關係如何﹖佢同兄弟姊妺玩唔玩得埋?佢點樣對佢嘅朋友?如果佢對其他人唔好,你就要小心喇,因為一旦你哋嘅關係穩定下來,佢嘅醜惡本性可能會現晒形,到時你就會好傷。

Step 5. 耐心相處

No Love No Sex「有愛先有性」,雖然老套,但每個女生都必須遵守呢個原則。喺同佢發生性關係之前,你一定要搞清楚佢係咪真心愛你,同你一齊唔係為咗你嘅身體。佢係咪肯承擔兩人嘅關係,認真對待呢段感情?你哋之間有無信任、尊重同付出?未肯定以上幾點之前,請唔好隨便交出你嘅身體,應該繼續耐心觀察。

學懂遷就:要成為情侶嘅最主要元素,係兩人肯作出妥協,學懂互相遷就。若其中一方或雙方夾硬要對方遷就自己,兩人嘅關係就會越來越火爆,最終都不會有好結局。例如佢一早應承帶你食buffet,但到嗰晚公司要OT行唔開,你就無謂硬要佢飛的過嚟,應該要體諒佢,等佢專心做好工作,約過第二晚或提議放工後食宵夜。做人要變通,唔好死牛一邊頸。

LOAD MORE