10個給他留下好印象的方法!

By COSMO

第一次見到心儀嘅佢,梗係想佢記得你,但要點先可以令佢對你留下好印象?以下有10招,大家不妨記低佢,等下次遇到目標時試一試!

1.放鬆啲

你哋第一次見面嘅頭3秒係好關鍵嘅時刻!所以,你要盡量放鬆心情。太刻意要留下好印象反而會弄巧成拙,例如講錯嘢或者做出啲失禮嘅行為。喺開始同佢傾之前,可以試吓深呼吸,有助放鬆心情,最緊要係要保持笑容!

2.切忌黑面

唔好成日都黑起塊面,一班人之中玩得最enjoy、笑得最燦爛嗰個係最吸引㗎!而且開心係會傳染,你嘅笑容都會令佢心情放鬆。

3.唔好懶醒

相信你都唔會鍾意懶醒嘅男生,同樣地,懶醒嘅女生都一樣無人鍾意!所以同佢嘅開場白,只需要簡單講一句:「hello,我叫xx!」已經okay。傾偈時,要提醒自己聽完對方講晒嘢先好接話,唔好急不及待爭住出聲,咁樣會令對方覺得你好aggressive。

4.注意眼神接觸

初初相識,傾偈時會唔知應該望邊,周圍望會令佢覺得你心不在焉,望佢身體其他部位又會令佢覺得唔自然。其實最好喺對話時,望住佢雙眼,但唔好死釘住,每隔幾秒就要稍稍轉移視線,佢再繼續講嘢時,就重複動作,而且要對佢嘅說話作出反應,例如點頭同微笑。

5.運用身體接觸

記住只係輕輕接觸,千祈唔好飛擒大咬,咁會嚇親佢㗎!當佢講嘢好好笑時,你可以輕輕拍吓佢手臂,但如果佢無拍返你或者避開你,佢可能對你無乜意思。不過就算佢有意思,接觸都應該只限於非敏感部位,攬頭攬頸就過晒火喇!

6.隨時保持狀態

無論幾時,你都要好好睇睇,梳好個頭、刷乾淨牙、件衫穿咗窿就唔好着!就算只係落街買少少嘢,都要保持靚靚同整潔。專家話:男生頂唔順一日用9個鐘化妝嘅女生,但同樣唔鍾意一啲唔識將自己打扮得企企理理嘅女生。

7.唔好「pair」吓、「pair」吓

挺直條腰代表有自信,企到駝晒背係無安全感同無生氣嘅表現。當你企直同坐直時,你嘅身體線條會好睇啲,亦會發出更強、更吸引人嘅電波。

8.唔好太自我中心

將所有說話圍繞自己並唔係好事,反而會令人唔識點應你。尤其係第一次見面,有啲嘢,遲啲熟咗先講啦!

9.有主見但唔好太主觀

千祈唔好人哋講乜你都同意,男生都鍾意一啲有主見嘅女生,但亦唔好包拗頸,要喺兩者之中balance一下。而喺發表意見時,亦要避免語氣過於激動。

10.做自己

你應該知道無論你假扮得幾好,最終都係會露出馬腳。如果你係食肉獸,就無謂扮食齋以為咁係淑女嘅行為。做回自己,顯示真性情,其實係最吸引!

LOAD MORE