男友唔鍾意我啲朋友,點算?

by Cynthia

人夾人緣,你唔鍾意男友班「兄弟」之餘,佢都可以睇你班「好姊妹」唔順眼,萬一男友真係同你班friends唔夾,甚至對佢哋反感,夾係中間嘅你又可以點做呢?

  1. 避免碰面:第一件事,係要避免佢哋見面先。如果你仲安排男友見到佢嘅「眼中釘」,大家面阻阻,分分鐘令討厭指數急升,你都唔想啦?
     
  2. 搵出問題:跟住就要搞清楚,到底點解佢會唔鍾意你啲朋友?係因為小事,例如你朋友一句開玩笑的說話令佢耿耿於懷,定係真係有某啲行為太過份令你男友反感?
     
  3. 令佢改觀:可以不經意咁漏少少口風,幫朋友講好說話,例如:「尋晚成班舊同學聚會,多得Mona好有心咁做搞手,先咁齊人咋!」;你亦可從朋友方面入手,婉轉話佢知之前某啲行為太過份,客氣地勸佢收歛下。當時機成熟,你可以帶男友出席聚會,等佢哋見吓面,話唔定可以撇除男友對好友嘅偏見。

CG! Reminds U:
無論你男友可唔可以同你嘅friend冰釋前嫌,你都要記住,男友係同你而唔係你班姊妹拍拖,所謂「人夾人緣」,如果佢同你啲朋友真係夾唔埋,你亦都無謂勉強,傷到大家感情咪仲得不償失?

 

LOAD MORE