暪住男友,跟好友他去旅行?

by TEXT : Chris

曾經有朋友問我:「我暪住男友,同男友人單獨去旅行,我哋會住同一間房,佢都有女友,我可以好肯定我哋唔會有嘢發生,咁你覺得有無問題?」

首先,你應該先問問自己:

1.     如果你同男友人係無嘢,點解要暪住男友?

2.     男友一旦發現,必定會很傷心,你忍心傷害他嗎?

3.     咁樣有機會破壞你同男友的關係,甚至分手,就算男友原諒你,心中好可能會有條刺,對你哋嘅關係必定有影響,值不值得?

4.     如果男友暪住你同某女生去旅行,仲要瞓同一間房,你會點諗?

5.     你點解可以咁肯定唔會有嘢發生?你會否太信任自己同對方?

6.     你心底裏,會否有一絲喜歡了男友人?甚至其實想跟他發展?

7.     點解你咁想去呢個旅行,甚至要暪住男友?

選擇暪住男友,原因不外乎係男友唔鍾意你同嗰個男生去街,又或者驚佢亂諗,但問題係,光明正大的事不需要隱暪,而且暪住男友,就等於親手破壞佢對你嘅信任!可能你會話,我話俾佢知,佢實覺得有問題唔想我去,最後只會吵架收場。但其實你可以做啲嘢令男友放心?例如:

1.至低限度,你哋應該分兩間房瞓。如果男友人同你講,兩個人一間房會平啲之類的說話,你大可以開玩笑地講:「無錢就唔好去旅行啦,我要自己一間房,哈哈哈。」仲有一點,諗清楚佢會唔會早有預謀,又或者有啲暗示,好大機會你入到間房,會發現係得一張床的double room嚟!如果唔明,可以睇睇Miss Sex篇文:以上床為終點的開場白



2.就算你哋無common friend,都可以各自帶埋自己嘅朋友一齊去,咁你男友應該會放心好多。再唔係,點解唔兩pair人一齊去?話唔定你男友見男友人同佢女友好sweet,又或者了解他多咗,之後就唔會再咁介意你同佢去街!

3.如果男友唔同行的話,旅行時耐唔耐WhatsApp吓男友,例如send張食物相俾佢,等佢知道你會掛住佢!

記住,真心愛一個人,應該多從對方的角度出發去諗他的感受,暪來暪去,只會親手破壞你哋嘅關係!

LOAD MORE