5大有害戀情的壞習慣

By COSMO

無論一個男生有幾愛佢女朋友,有啲壞習慣始終係戀愛嘅致命傷,最慘係女生仲以為咁樣可以增進彼此關係!如果你犯咗以下錯誤,盡快戒咗佢喇!

1.同佢班Fd玩得太埋
本來你同佢啲Fd融洽相處係件好事,但如果你同佢哋太熟,就等於踩入咗你男友嘅安全範圍。所以你一定要識得balance,如果佢要同班friend去睇波,你可以約班姊妹去飲嘢,唔好死都要痴住一齊玩,各自各精彩。

2.一味死忍
約好8點食飯,佢在無合理解釋、通知的情況之下奉旨9點先出現,你仲笑笑口咁講「唔緊要啦」?!男生時時刻刻都想測試你嘅底線,你退一步,佢咪踏前多一步囉,所以絕對唔可以俾佢逼到你無退路,喺適當嘅時候一定要表達你嘅不滿!

3.戀愛大過天
有啲女生開口埋口都話「我哋點點點……」,喺戀愛中失去自我,只會令關係變得淡而無味。一段健康快樂嘅關係應該係各自擁有自己嘅私人時間,唔會迷失自己。所以當你想喺weekend搵班Fd傾偈傾通宵,Let’s go! 保持獨立嘅個性,愛情就唔會凌駕你嘅自尊。當你男友見到你擁有自己嘅生活,反而會更加欣賞你。

4.「污Where」當Casual
起身刷牙洗面,之後就笠頂帽出街,呢種行為偶爾做吓都OK,但就唔可以日日都係咁!好多女生以為男生鍾意佢哋純樸嘅真面目,但就忘記咗約會初期為男友悉心打扮嘅日子。99%男生都重視視覺享受,當你唔再花時間修飾自己,火花就會消失。不妨喺出門前塗上少少唇彩,又或者着上佢鍾意嘅連身裙,等佢重溫初初見你時驚為天人嘅感覺。

5.過分誠實
男生有時未必能夠承受事實真相,善意嘅大話是必需的!例如當佢問起你父母對佢有咩感覺,即使佢哋明明係覺得你男友十足一個16歲小男生,唔夠成熟,但喺呢個時候,你唔想hurt到佢,就可以答:「佢哋無乜點講過,等我得閒問吓先。」事實上,男生亦不時會講善意嘅大話,而佢都係唔想你唔開心先咁講啫。
 

LOAD MORE