追你時當寶,追到後當草?

By COSMO

拍拖初期,男生總係無微不至兼熱情如火,但點解時間耐咗,佢哋就會變得唔同晒?

約會初期,男生會向你展示佢最好嘅一面,皆因佢要落力sell自己嘛!但當你成為佢女朋友之後,佢嘅行為就可能180度轉變,甚至俾你負面嘅感覺,但事實又未必咁差嘅!

1.佢由強人變做弱者?

普遍男生都認為女生鍾意啲夠man又有男人味嘅男友,於是總係想以強者姿態出現,但其實通常佢哋都係得個樣,暗地裏都想有時俾人氹吓 。所以當佢向你訴苦時,一定要耐心聆聽同俾支持佢,但就千祈唔好過晒火係咁俾意見,記住你係佢女朋友,唔係佢阿媽呀!

2.佢開始同你嗌交

男生會盡量避免同女生爭執,因為蝦女仔絕非大丈夫所為,但如果佢堅持己見同你拗到底,咁反而代表佢有同你長遠發展嘅打算,如果唔係佢大可以暫時忍下你,唔使大動肝火同你嗌交咁麻煩。其實如果可以喺爭論之中解決問題,更加了解對方,反而會令關係更加穩固添!

3.佢突然話要自由?

追緊你嘅時候,佢可以為咗見你而放朋友飛機,但當關係穩定之後,佢就會重新渴望有自己嘅社交圈子同play time,唔想因為拍拖而無咗自由。當佢同你講要同朋友出街時,你大可以答佢:「好呀,咁我都約班朋友出去飲嘢。」你嘅獨立大方會令佢鬆口氣之餘,仲更加欣賞你。

4.佢少咗出聲

初相識時,無論係見面定傾電話,佢都可以同你雞啄唔斷,直至你哋一齊咗之後,佢就開始講少咗好多嘢,甚至淨係識答你「哦」、「ok」。其實佢只係覺得同你一齊好relax,唔使再嘥口水嚟討好你,呢個其實係更深層次嘅親密關係嚟㗎!

5.佢唔再熱衷Sex

佢嘅熱情冷卻可能會令你好hurt,但咁唔等於佢唔愛你,換個角度睇,一對情侶之間少咗性生活,可以係代表佢哋之間多咗其他方面嘅連繫,例如係思想同心靈上嘅分享,呢個正正係情慾同愛嘅分別。

6.佢提出奇怪要求

當你同男朋友變得越來越親密,你哋嘅sex亦變得重質不重量,而且可以容納更多創意,因為佢信任你,同你一齊嘅時候感到自在,唔怕俾你覺得佢係怪人先會提出要求。如果你要拒絕佢嘅新idea,態度要溫和啲,並提出你嘅主意出嚟緩和氣氛。

LOAD MORE