如何令男友妹妹唔仇視你?

by TEXT : 韋寶

曾經有朋友話同男友妹妹相處唔到,原因係佢唔鍾意男友太錫阿妹。我亦曾經聽聞「男友妹妹」唔鍾意哥哥的女友,原因都係因為呷醋。

姑勿論點都好,如果你同妹妹「面左左」,只會令男友夾喺中間,甚至有機會令他覺得你小器。相反,如果你跟他的妹妹做朋友,就有好多好處:

*你可以從妹妹口中聽到佢哋嘅兒時趣事,從而了解男友多一啲。

*男友家人見你同妹妹friend,自然會對你加分。

*萬一你同男友發生咩事,都有人幫口。

咁到底點先可以同男友妹妹做朋友?

首先,如果你真係呷醋,就要調整自己的心態,先要將她當成自己的妹妹,咁你就自然會對佢好啲,亦唔會咁介意男友錫佢。而如果呷醋的是妹妹,你就更加要對佢好,等佢知道自己唔係無咗個哥哥,而係多咗個關心佢嘅姐姐。

你不妨主動啲向妹妹示好:

1.女生都愛shopping,你可以向她展示你的「戰利品」,問吓佢覺得點襯先靚,又或者同佢分享你買到嘅平靚貨。咁下次佢買到「正嘢」時,就自自然然會諗起同你分享。

2.除咗shopping,化妝護膚都係女生講唔完嘅話題!你總有啲用咗一、兩次但又唔啱用嘅化妝品 / 護膚品,你可以問吓妹妹啱唔啱用,如果佢唔mind,可以轉贈俾佢;唔啱用 / 用唔完嘅sample,可以送俾妹妹。又或者,買咗盒新mask,可以分啲俾妹妹試,試完又可以交換試後感!

3.如果你同男友喺佢屋企附近食嘢,不妨打電話俾妹妹,叫佢一齊嚟。

4.女生都愛零食,你可以不時買啲得意零食給她。

5.當你哋開始熟絡,她好可能會跟你分享感情事,要注意,呢樣嘢妹妹一般唔會同哥哥分享,因為通常會覺得尷尬 / 感覺怪怪 /驚哥哥鬧,咁你就可以成為她的分享對象,唔係話要你做「軍師」,你只需要細心聆聽,分享吓自己以往嘅經驗,咁就已經好夠。不過要記住替她保守秘密,包括你男友!否則你便會成為無信用的八卦精。

6. 如果妹妹一開始就對你有點敵意,唔使緊張,當作感覺唔到一樣,然後照以上方法去對待她,她的態度慢慢就會軟化了。

記住,同男友妹妹做朋友嘅重點,係在於你真係當她係自己的妹妹去疼錫,因為真心做嘅事,對方係會感受到架!

LOAD MORE