提升吸引力的八大法則

by Cynthia

問起男生的擇偶條件,十居其九都會提到要「有氣質」,聽到呢啲咁虛無縹緲嘅要求,女生可能會嗤之以鼻,但係你又有無諗過,「氣質」其實就是「內在美」?提升自己的內在美,而不是只有漂亮軀殼的女生,你自然變得更吸引更有魅力啦!

  1. 多看書:唔係叫你睇多啲八卦雜誌,而係多閱讀提升自己的內涵,可以試下睇唔同類型的書,例如小說、散文,可以令你眼界大開,俾你思考的空間,而心靈書籍就可以幫你尋找自己,諗多啲人生問題,就算係輕輕鬆鬆的繪本,都可以令你頭腦靈活兼多一份創意。就算平時幾忙都好,都盡量抽臨睡前的半小時看看書,持之以恆,你會慢慢發現自己的進步!
  1. 認真工作:成日話「認真工作的男人最迷人」,其實女生都一樣,專注工作/學習的人是會散發出與別不同的魅力!試問如果一個人終日懶懶閒,又或者成日怨工作辛苦,人哋又點會發現你可愛嘅一面呢?認真投入工作之中,做一個懂得play hard, work hard的女生吧!
  1. 喜愛自己:老生常談都話:「如果你唔愛惜自己,人哋又點會鍾意你?」要知道,每個人都有佢可愛嘅地方,即使你覺得自己有幾黑仔幾唔得人鍾意,你都應該要有一個正向思想,學吓appreciate自己的優點。與其自怨自艾,不如多啲同朋友傾偈互動,你會發現別人眼中嘅自己並唔係咁差!你亦可以睇一啲提升自信嘅書,學習喜歡上自己。
  1. 欣賞別人:如果你唔係上面講嘅「自卑女」,而係自信爆棚嘅「高傲女」,咁你可能就要試吓將目光多啲放喺旁人身上,學習欣賞其他人。簡單如見到朋友個好靚嘅新手袋,都可以開口讚吓,人哋都會欣賞你嘅大方同眼光!
  1. 建立興趣:當人哋問起你平時鍾意做乜,有啲女仔會好自然就話「行街睇戲食飯囉!」,咁樣只會俾人覺得你係個倒模公仔,毫無特色。多發掘,繼而發展自己的興趣,例如你鍾意整嘢食,就可以多研究唔同甜品嘅做法,請吓朋友試食。有專長的女生,特別容易令人留下深刻的印象,亦都更有吸引力!
  1. 做回自己:有氣質唔等於做人要假,反而保持真我先會得人鍾意!如果你係個文靜女生,無必要喺人前特登扮健談,咁樣只會令你顯得更odd,辛苦嘅只有自己。做返個不造作的女生,先可以展現你最attractive的一面。
  1. 平易近人:有氣質唔等於要做不食人間煙火嘅小龍女,多睇新聞,留意多方面嘅資訊,咁樣最起碼同人哋有共同話題。不過,就算你係某方面嘅expert,喺外人面前都切忌「有你講、冇人講」,例如人哋講起近來邊套戲好睇,你就起勢分析攝影手法同比較導演以往作品,係人都驚咗你啦!
  1. 注意儀表:不一定是最重要,但一定不能缺少的一項,外在美是每一個陌生人對你的唯一印象,因此即使你的內在有多美,如果你有一個「趕客」的外表,別人根本無法認識那個擁有美麗內在的你。
LOAD MORE