有愛情煩惱搵占卜師搞掂?

by Karen C. & Howey

好多時女生喺愛情上遇到煩惱或者困擾,都會去搵占卜師、塔羅師、算命師等等,務求可以搵到答案或者指引。不過,又係唔係每個人搵完個占卜師之後,問題就可以解決,又或者個人會開心咗……

占卜答案=影響心態?

有時候,當你去問問題時,你得到的答案,可能係你唔想聽的,例如:你的問題係「我會唔會有機會同佢復合?」,得到的答案係「唔會」;如果係咁,你係咪又真係會死心?定只會令自己更加唔開心?如果答案係「會」,你好可能只會一心等待住呢一日的來臨,而最後係咪真係會發生?無人知;如是者,你可能會白白浪費咗光陰,而錯過了另一段愛情。

曾經一位單身很久的朋友A問過一位塔羅師:「我幾時會搵到Mr.Right?」,塔羅師說:「你呢半年都只會有霧水情緣,你都係繼續玩啦。」然後朋友A就一直以「繼續玩」的心態去結識男生,至今仍然單身。不是那位塔羅師的說話準唔準的問題,而是問卜者的心態問題,無論在任何情況下,當你抱住「玩」的心態去結交異性,自然容易吸引到「玩」的男生。

又有啲人,好鍾意將同一個問題問N次,睇完塔羅,又走去睇相/八字/紫微斗數etc.,因為佢哋希望總有一日會聽到自己心目中想要的答案。在這個問完又唔滿意的過程中,情緒和想法不斷反來覆去,整個人充斥負能量,陷入低潮。那麼問卜對這類人來說實在是浪費金錢又無積極意義。

當一個人需要去尋求「指引」,通常都已經幾迷失,需要有人幫自己搵答案,但是到底怎樣在「向占卜師尋求協助」/所謂的「預知未來」,與「自己掌握個人命運」間取得平衡呢?

如果抱着積極的態度,想了解自己,從而為自己理出一些頭緒的話,去找占卜師會有某程度上的幫助,占卜師的角色很有趣,有時就如人生教練/心理輔導員。但如果一心只是望天打卦,等運到,而沒打算主動做些有建設性有意義的事,令自己變得更好的話,即使是多厲害的人物、說得有多準,又如何?

遇上不負責任的占卜師……

一個負責任的占卜師,除咗會話你知事情會點發生之外,更加會俾到你建議,等你可以改善問題,而唔係只會話你知點點點,然後就收你錢。咁樣除咗令你得唔到指引之外,亦會令你更加無助。所以,大家有問題需要搵占卜師的話,建議你要搵一個負責任,而且信譽良好的,始終大家的目的都係想獲得正面的幫助,令自己走出困局。

CG!並唔係反對你去搵占卜師,亦都明白大家有時好迷失,需要尋求一些指引。不過亦不能過分依賴或迷信,否則只會令自己心態受到影響,阻礙本身的獨立思考,令自己更難走出困局。

LOAD MORE