瘦人就唔會膽固醇高?

by Text:韋寶

唔好以為瘦人就唔會膽固醇高,亦唔好以為淨係肥肉、雞蛋、鹹蛋同內臟先係高膽固醇嘅食物,細閱以下嘅貼士,可以令你更健康:
 
1. 成日話鹹蛋唔健康,咁到底有幾唔健康?世界衛生組織建議每人每日進食的膽固醇不宜超過 300 毫克,而一隻中型鴨蛋,就有619 毫克膽固醇!至於1 隻中型雞蛋同小型鵪鶉蛋,就分別係213 及74 毫克 。
 
2. 只係高脂食物先至膽固醇含量高?No No No!好似蛋類同魷魚都屬低脂食物,但每100 克魷魚,就有 233 毫克膽固醇喇!
 
3. 動物皮層亦屬膽固醇高之物,例如豬腳、鴨掌、雞皮及雞腳。
 
4. 椰汁、椰絲、椰肉、椰油,仲有含有上述東東嘅食物,好似咖喱、雞尾包、葡汁、糖水、椰撻及喇沙等,都少食為妙。
 
5. 海鮮類的膽固醇含量亦較高,例如蝦、墨魚、大閘蟹及蠔。

CG!話你知:
1.成日聽到好膽固醇同壞膽固醇,即「高密度脂蛋白膽固醇」及「低密度脂蛋白膽固醇」,前者有預防冠心病的作用,而後者則會增加患冠心病的機會。

2.食物食咗落肚之後,身體會將食物轉化為好膽固醇及壞膽固醇。咁到底有咩因素會影響其轉化?星屑醫生歐陽英傑表示,主要因素包括基因和後天因素。食物本身所含脂肪的性質,對轉化為好定壞有決定性作用。服用奧米加3魚油和高纖維飲食,就能增加好膽固醇的水平。
 
記住,攝取過量嘅膽固醇,會增加患心臟病嘅風險!唔想未到老就咩都唔食得,咁就要好好注意飲食同多做運動喇!
 
LOAD MORE