唔想愛錯人?向男生偷愛情秘技!

By COSMO

雖然男女關係的確較以前平等,但現實話俾我哋知,男生有的power好多時都比女生強,尤其响愛情方面!當你發現渴望吸引異性、努力學習同異性相處的多數係女生時,就知道男生在愛情上的確比我哋多一點優勢。CG!而家話你知男生的愛情招數,好好向佢哋學習,就可以提升自己的love Power!

我們女生有一個好錯好錯的觀念,就係:女生約會男生的終極目標係搵一個可陪伴一生的「真愛」(男朋友/老公)!喺未搵到呢個人之前,只會不停遇上一個又一個令自己失望的男生,終日變得徬徬徨徨,甚至懷疑自己的魅力。男生呢?佢哋拍拖只為了開心,就係咁簡單。所以,當你可以學男生一樣,接受「拍拖只為了開心」的大前提後,就唔會再作無謂的尋覓,放膽去認識更多的男生,交往變得輕鬆自然。

打破「一對一」的框框

女生總喜歡採取「一對一」的方式選擇對象,例如會同第一個有好感男生,或唯一一個追求攻勢強勁的男生約會,並認定佢就係the ONE!但係,男生喺正式選定女友之前,不介意同時間同幾個女生交往。佢哋清楚知道:約會對象越多,選擇越多,也對自己的要求越清楚。

所以,在正式選定男友之前,最好先同幾個男生出吓街(最少三個),見得多,自然識得揀個好嘅。如果你遇上有好感、同你夾的男生,不妨同佢出多幾次街,你就會知道佢適唔適合你。同佢約會之後,你唔需要係咁等佢電話或msg,大可利用空檔時間同其他男生約會。記住,同男生約會去街永不嫌多!

總之,你一日未正式搵到男友,都無必要用「專一」同「認真」來規限自己。畢竟,你只係想識多幾個好男生,而唔係隨便同男生上床,咁樣唔關cheap唔cheap事。

收放自如

女生另一個錯係,當遇到心儀的男生時,總會時時刻刻都想同佢一齊,無時無刻都諗住佢,為他而活似的!男生明白,保持神秘感、約會後唔會馬上打電話俾女生,可以令對方更掛住自己。所以我哋都應該多多向男生學習,約會後唔使心急聽到/打探對方消息/口風,等下次見面時帶住靚靚嘅笑容出現就得。多數男生都係鍾意向難度挑戰的動物,越難得到的,就會越想辦法得到!

活在當下

男生搵可愛、有趣的女生約會,女生卻認為要搵個有潛質的男生做男友(或老公!),然後費盡心機將佢訓練成好男友、好老公。男生對於女友有無潛質成為好老婆或同自己天長地久,在這個階段可能幾乎完全無諗過。

所以,決定同佢拍拖之前,請唔好諗得咁長遠,亦唔好企圖改變佢,打算將佢培育成你心目中的「100%男友」。男生唔會花時間去改變一個女生,如果鍾意佢的話,即使佢有缺點都會照單全收。一旦發現大家唔夾,就會分手。如果你同一個男生一齊,花喺改變佢的時間仲多過開心的時候,等於你根本唔鍾意呢個人,你鍾意的,只係你自己幻想出來的人罷了。

因此,同男生交往,應將重點放喺「現在」,而唔係「將來」。用「enjoy yourself」的態度來對待愛情──只要一齊開開心心就夠。

唔好胡思亂想

喺感情方面,女生總喜歡勁分析自己同別人的感情關係,而男生對感情的討論係近乎零,佢哋只想開心,講多無謂。

所以,你絕無必要分析佢所講的每一句說話同每一個表情動作,亦唔好問「你到底愛我定鍾意我?」、「如果愛情變成感情,你會覺得點?」呢類令男生毛骨悚然的問題。你亦都唔需要日日話佢知,自從你識咗佢之後,你嘅生活多咗幾多浪漫色彩;如果真係想獎勵佢,不如用行動表示,俾多幾個kiss佢,陪佢做一啲佢鍾意的活動。

CG! Tips:

唔好埋怨好的男生都死掉了,只係你無好好發掘!多啲同唔同嘅男生交往,喺佢哋身上學習愛情秘技,就自然較容易搵到一個妥妥當當的男朋友!

 

LOAD MORE