唔想嚇走好男人,可以點?

by Cynthia


做人女朋友,有時總會好緊張另一半,驚佢呃自己,甚至出軌。但當緊張得太過火,成日check住晒,唔單止可能會有反效果,仲分分鐘會嚇走啲好男人添!

咁究竟點先為之過火?例如:
1.    每次打電話俾男友冇人聽,就會覺得不安,係咁打俾佢;
2.    每晚傾電話都要知道男友當日的行蹤,要佢詳細「報告」每個細節;
3.    男友話咗你知同邊個出街同去邊,但佢同朋友聚會時,你都係忍唔住不停SMS同打電話俾佢問呢樣問嗰樣。

呢個時候,你應該問問自己點解會咁:係咪因為俾前度男友呃過有陰影?定係男友身邊有太多女性朋友,令你覺得受威脅?如果係前者,你應該嘗試放低過去,唔好俾以前嘅事影響宜家段感情;如果係後者,你應該調整下自己的心態,要知道有異性朋友都係正常事,就算你自己都會有男性朋友啦!

唔係話緊張對方係錯,但係將心比己,如果男友不停打「奪命追魂call」check住晒,你都會覺得煩吧?不妨試下換個方法,一齊傾一個令大家都覺得舒服嘅方式,例如請男友出街前 / 後打一通電話給你,或者偶爾帶你出席聚會,認識下佢嘅朋友。如果你冷靜分析之後,依然覺得男友有嘢暪住自己,不妨坦誠講出嚟,話俾佢知你嘅憂慮。講到底,如果想一段關係好好發展,兩個人互信同坦白都係好重要架!

LOAD MORE