分手後,我想鬧爆佢!

by Karen C.

當一段戀情終結,你俾佢飛,受害者係自己,除咗傷心之外,你仲可能好嬲,好想做一啲事向佢報復,而你可以做嘅,就係搵一次機會鬧爆對方,以洩心頭之怒!

要鬧爆對方,方法有兩種:1. 兜口兜面 2. 親手寫信

如果你要實行鬧爆對方的計劃,請記住:機會只得一次!

  1. 兜口兜面鬧爆佢

由於你只得一次機會,所以計劃進行之前,必須作好好的部署。要記住,約佢出來嘅目的係想傾清楚,就算係鬧爆佢,都唔係叫你好似癲婆咁嘈,應該盡量用一個和氣的心去同佢傾。所以,約佢之前要諗清楚你有啲咩想同佢講,你想對佢表達的不滿係啲乜。最重要的是make sure佢唔會做出傷害你的事,同埋自己出到嚟唔會情緒失控,否則有反效果兼對大家都無好處。

地點方面,唔好揀一個太多或太少人的地方,可選擇屋企附近的公園、學校某角落,並且約定幾個朋友做支援,如果發生激動事件,都有人即刻出嚟幫手!

當你部署好一切,就可以約佢。如果你唔想打電話,可以用短訊形式同佢講:「我有啲嘢想同你講清楚,不如出來見一次面。」語氣要心平氣和,唔好用恐嚇語氣,否則對方俾你嚇到唔敢出嚟!

可能有啲男生會膽怯,或種種原因,始終都唔肯出嚟同你見面,咁你鬧爆佢嘅方法,就要轉做第二種──寫信。

  1. 親手寫信

首先,你寫呢封信嘅時候,千祈唔好有期望對方睇完之後會回心轉意,又或者佢會回你信,咁呢封信先寫得有意義。就算最後對方回信俾你,都請你無須理會!

第二,你應該係親手寫信,而唔係用E-mail、Whatsapp或任何電子通訊器材,因為當你用筆寫字時的力度,某程度上係可以幫你發洩了部分情緒。而且,寫信係減低咗你對佢回信嘅期望,用E-mail、Whatsapp會較容影令人期望住對方係會回應。

當你一路寫緊呢封信嘅時候,其實都係你重新檢視緊呢段過去的感情,你會一路寫一路減低咗憤怒,因為你會發現原來自己喺呢段感情上犯過錯,都有責任去承擔呢個後果,慢慢你會無咁憎對方。所以,寫信的過程其實會令你釋懷同埋成長。

不過,如果你發現你點寫都好,對方都係一個衰人,咁你索性唔需要寫呢封信!因為根本係無意義,亦幫唔到自己解脫。        

一次性的「鬧爆對方」行動,主要係表達返自己被飛後的委屈,你做呢件事係完全係為咗自己,令自己內心舒服啲,也給自己一個機會檢視這段已死的感情,下次學精。所以,你就算幾嬲都好,都要控制自己要平心靜氣去做呢件事。

切忌用一啲陰質方法去報復或發洩,例如喺Facebook唱衰對方、不停打電話騷擾佢等等,咁樣唔單止會封自己後路,其他人亦會覺得你人格好差,其實重點係你會繼續充斥負能量,自己又唔開心,分分鐘影響埋你下一段感情,Not a good idea!

LOAD MORE