單身女的幸福 由家居開始!

by Karen C.

缺乏愛情滋潤的單身女生,都會認為自己幸福度極低,整個人都充斥住負能量。尤其是係自己一個搬咗出去住的單身女生情況可以更嚴重,其實只要你願意花心機同時間為自己屋企做布置,即使無愛情的滋潤,都可以為自己增加幸福感!

如果你係自己一個住的單身女子,試諗吓你屋企除了基本的傢俬之外,你有無花啲心機同時間去買擺設?你買家品嘅時候,係咪求其揀啲basic款就算?又或者你買餐具係咪只買一件,只係預俾自己用?

家居布置係一個心理反映,如果你都唔願意花心機布置,又或者屋企嘅餐具都只係夠自己用,就代表你無預過有其他人(包括朋友或男友)會進入你的生活,呢種心態自然令你悶爆,只會令你頹上加頹。

為自己增加幸福感的方法:

1)      買一啲裝飾品布置屋企,例如:花樽、相架、掛畫、擺設品,甚至將床單、浴簾等等都換上自己鍾意的款式。當你見到屋企靚啲,人都會開心啲。

2)      買餐具時唔好只買平實款,不妨揀一啲比較精美(甚至浪漫)的款式,仲要記住至少要買一pair,以用來準備招呼你將來的伴侶或其他知己朋友;潛移默化地將「我不是一個人」的心態植入心底。

3)      閒時招呼朋友到你家high tea,既然女生愛食三層架tea set,不如嘗試親手做吧!只需要買一套英式茶具以及一個三層架,再親手做一些糕點,你和朋友便可享受一個relax的下午。(如果你係同屋企人一齊住,都可以同屋企人分享啊!)

4)      耐唔耐執屋時,將少部分家品擺設轉換位置,會有煥然一新的感覺。

就算你單身,你都應該要有一個「準備迎接新戀情」的心態,同埋唔好營造一個「我好孤獨」的感覺,因為你人生入面除咗愛情,仲有家人同朋友,只要你懂得愛自己多啲,識得俾幸福自己,先會更容易吸引別人愛你!不如就從家居布置開始,為自己注入幸福啦!

LOAD MORE