追人還幾十蚊好尷尬?

by Karen C.



你有無試過,有時身邊的朋友或同事借咗你小數目的錢(通常係飯錢、車錢、少量散紙),但之後佢唔記得還俾你?呢個情況下,大部分人都唔好意思問佢攞返,因為驚對方覺得自己好孤寒,少少錢都要拎返。但其實,有時啲人幾蚊、幾十蚊咁借,借借下都唔少數目架嘛!

撇除那些專登借人錢然後扮唔記得還嘅人,一般人借完你錢,真係好容易轉個頭就唔記得咗(尤其係呢啲咁小數目嘅錢),但佢哋唔係有心唔還,只係唔記得而已。而呢類人其實係唔會mind你叫佢還錢,講到尾都係自己覺得尷尬同唔好意思,所以遇到呢個情況,你可以做的,其實係衝破自己嘅心理關口,開聲請對方還錢。

當然,為了將尷尬情況減到最低,兼自我感覺良好一點,開聲請人還錢都要有少少技巧。

1) 可以選擇喺下次再同對方一齊食飯埋單嗰時,借啲意同佢講:「你可唔可以借住廿蚊俾我先?我無散紙。」呢句說話唔多唔少都可以勾起佢未還錢俾你嘅記憶。

2)如果佢真係唔記得,咁你就扮成突然醒起,然後話:「咦,上次食米線嗰時你好似借咗我四十蚊未還喎……」咁樣對方自然識做。

3)仲有,唔係叫你無啦啦衝去人個位問人拎,可以傾開閒計時,喺輕鬆的氣氛下,搵機會提提佢。

只要衝破自己嘅心理關口,加上夾好timing,其實請人還錢都唔係太難開口吧。但如果你係借人錢嗰個,就記住自動自覺還錢俾人,唔好要人尷尬喇!

 

LOAD MORE