同心儀男生出街好悶,點算好?

by Karen C.

唔知大家有無試過,等了又等,終於等到同自己心儀的男生約會,但出到嚟竟然覺得成個約會過程好悶。其實呢個情況好常見,因為好多時你只係同對方隔空喺WhatsApp、SMS或者MSN溝通,大家根本唔了解對方的言行舉止,所以出到嚟面對面相處時,大家可能唔多自然兼唔知講乜好,有時個氣氛都幾尷尬。

有啲女生遇到呢個情況,就會喺約會時不停WhatsApp自己的女性朋友,問朋友點算、應該點做,報告晒成個情況兼大吐苦水……但係,呢個行為真係好唔要得!試諗吓,你不停喺度「篤」個電話,對方可能會覺得你唔在意佢。如果你約會時都唔投入,又點可以怪責對方呢?

如果大家約到出嚟,真係無咩話題,又或者成日都係漫無目的咁周圍行,你可以:
1)主動帶起一啲的話題,例如:邊間餐廳好食、邊個Apps好玩或家中竉物的趣事。
2)行街見到啲搞笑嘢就同佢分享,一齊笑下。
3)提議去一啲得意、好玩的地方,例如有特色的cafe。
4)主動問多啲佢嘅意見,了解吓佢諗緊乜。

記住,要努力享受同佢一齊的時光,先可以從中了解對方適唔適合自己嘛!

LOAD MORE