5大保護眼周肌膚的王道!

By COSMO


咪以為眼周肌膚好地地就咩都唔使搽,實情係一旦出現眼紋油脂粒,任你用邊隻眼霜都補唔返。應該點?溫柔地對待眼周皮膚,加上揀啱眼霜才是王道!當然,CG!仲有唔少tips俾大家!

1. 使用正確方法去黑眼圈
 
有傳敷青瓜片、薯仔片、凍茶包可去除黑眼圈,實情係無樣得,咁做只能暫時補水,短暫改善眼圈部位因缺水而成的膚色暗啞而已。如果有人真的長期用以上方法成功去除黑眼圈,只能說是比中七千萬六合彩還幸運的個別例子。
 
解決黑眼圈的終極辦法,只有一個:就係每天早瞓,有充足而優質的睡眠。不過咁,如果睡眠充足都仲有黑眼圈,就有機會係患上慢性鼻炎,又或者瞓得太多、少活動而影響新陳代謝。
 
當然,唔好令雙眼過勞,尤其經常要對住電腦工作的,最好養成每工作一小時就讓雙眼休息一陣,望向遠處及轉動眼球放鬆一下!
2. 按摩可令眼袋消失?
 
有說使用適當眼霜配合按摩手勢可去除眼袋,真相係:正確按摩手法只有助排走積聚於眼周的多餘水分,對於積聚的脂肪、年紀大眼部皮膚鬆弛(尤其年過三十),都係無乜幫助。只有暫時性的眼腫可用冷敷、按摩或緊緻眼霜來改善。
 
曾有傳痔瘡膏能去眼袋,但真係唔鼓勵你試,因為其配方不是為眼部皮膚而設,容易刺激雙眼。而去妊娠紋的按摩膏就更加唔啱,因為需要配合大力按摩的動作,不適用於眼部皮膚之餘,更可能捽出眼紋!
 
要預防眼袋形成,你話老土都要講,就係從生活同飲食習慣着手:避免進食味精重、鹽分高的食物,兼勤做運動促進血液循環。想避免水腫,臨瞓前唔好飲太多水,就算飲都要睡前習慣上廁所,半夜尿急亦唔好死忍。當然,唔好臨瞓前睇苦情戲/小說,或者同男友嗌交,因為哭腫雙眼係化咩妝都救唔到架!
3. 眼周需要油分
有說眼周不能使用含油分的產品,因為會生油脂粒。其實油脂粒形成的原因有很多,包括毛孔堵塞、角質代謝問題等。眼周的皮膚較薄,易感乾燥,的確需要油分來保濕,不過就應該揀接近皮脂的油分,包括乳木果油、牛油果油、角鯊烷等。
 
4. 對眼部肌膚要好似男友咁溫柔!
如果眼部肌膚狀態良好,未有出現幼紋,都需要搽上保濕啫喱質地的eye gel。而且唔好恃住皮膚好就忽視以下的生活習慣,包括不要習慣揉眼,而搽眼霜、戴隱形眼鏡、畫眼線及搽眼影時,動作都要溫柔。
 
5. 使用防曬眼霜
由於面部防曬霜的某些成分可能會刺激雙眼,造成眼紅及流眼水等,尤其加入較多酒精、薄荷類成分的,就最好避免用於眼部。選用專為眼部而設的防曬眼霜會較為安全。
 
記住,美麗是要努力經營的!唔想睇上去大過你真實年齡,就要好好保護眼部肌膚啊!
LOAD MORE