男友大我好多年,究竟work唔work?

by Karen C.



近呢幾年,身邊有幾個朋友都不約而同地同一啲大自己好多年嘅男生拍拖,「好多年」的意思,已經唔係七年、十年咁少,最勁的有十六年,甚至二十多年!起初大家知道兩人相差咁多年,都非常之驚訝,仲令周圍的朋友議論紛紛!大家都好想知雙方年齡相差咁多年,究竟呢段愛情關係work唔work呢?

好多女生遇上呢個問題,都會覺得非常煩惱,甚至會因此而卻步,唔敢同對方開始關係。

以下係你可能會憂慮的事:

1)      父母反對

2)      對方已到達適婚年齡,自己可能剛投身社會,見識尚淺,如果同佢結婚生仔可能要以家庭為重,放棄事業,甚至不能達成自己本身有的夢想。

3)      出生年代不同,同佢啲朋友聚會時,好難搭到嘴。

4)      步伐未能一致,他的計劃未必如你所想。

5)      如果結咗婚,對方的弟妹年紀又比你大,但自己的輩分又比他們高,身分上有點尷尬。

6)      將來佢老咗,要全心全意照顧佢,仲可能面對對方比你早離世的事實。

7)      擔心別人的眼光。

雖然係咁,但曾經有研究指出,丈夫比妻子年長15歲,婚姻生活最為美滿,因為年長的男性比較體貼關心,而且有經濟基礎,妻子婚後生活安穩,減少爭拗的機會。而且佢嘅人生閱歷較多,可以幫你分擔不少人生上遇到的難題。

雖然有女生仍然好反對,甚至試過之後覺得怕怕,但其實最重要的是:大家有無默契,性格夾唔夾、溝唔溝通到,年齡唔係最大問題!

即使佢大你十年廿年都好,如果你兩個係啱傾,有共同的興趣,行埋一齊已經好夾,相處好舒服,目標相近,咁就已經好OK!至於步伐唔一致,係可以用時間慢慢調節,只要大家互相有堅定的信心,就唔需要擔心太多了!就算俾你搵到個年齡相近,但思想完全唔一致,咪又係成日嗌交,最終分手收場!

不過呢,你要接受成熟的男人思想上會較實際,做每件事都會諗將來,並唔會花好多時間去做一啲不切實際的事,例如激嬲咗你之後,佢唔會搞一場「大龍鳳」去氹返你!

所以,兩個人可唔可以開花結果,除咗睇大家夾唔夾之餘,仲要睇雙方有無共同努力去建立呢段關係。如果你仲囉囉攣,不如問清楚自己想點、究竟需要一段點樣嘅關係,然後坦白同對方傾吓,自然就會有答案喇!

LOAD MORE