全城喪打憤怒鳥之謎!

By COSMO


一隻紅色圓碌碌、名為憤怒鳥的傻雀居然可以瘋魔全球,成為幾乎所有擁有智能電話的人都會下載的Apps!
據統計,全球的人每天花在打憤怒鳥的時間長達二億分鐘,相等於16年!!!
究竟憤怒鳥有咩魔力,可以獲得全城寵愛?

1. 3S遊戲成功元素!
3S即係simple、short及stupid。
即係咁,佢嘅遊戲玩法簡單,只係彈出憤怒鳥打綠豬,話咁快就過關,所以好易取得成功感!
仲有,主角個樣夠卡通夠可愛兼夠蠢!就算奸角個樣,都係衰得來好cute的!
 
2. 「差啲就過關喇」的心態!
憤怒鳥的遊戲模式是難度會越來越高,當難度越高,就越係差少少就可以整死剩下的那隻綠豬。
由於總係差少少就過關,就係嗰少少,會令你好想再接再厲而停唔到手! 
 
3. 愛玩的天性!
有邊個唔鍾意玩先?若果唔係要讀書要返工,有邊個唔想日日去玩?
但係玩呢個慾望自細就被壓抑,父母總係話:「唔好玩啦,做功課 / 溫書 / 補習/ 掃地啦。」
彷彿玩就係唔啱嘅事,仲要係浪費時間果隻!
不過咁,鍾意玩始終係人嘅天性,只要搵到合理嘅原因,
例如「隻雀仔圓碌碌,好搞笑」,又或者「篤兩篤就玩到,好易玩!」,咁愛玩天性咪出晒嚟囉!
 
4. 拋物線的迷戀
Wall Street Journal 的專欄作家Matt Ridley話過,人對投擲而產生的拋物線是有種原始的迷戀,
睇起嚟好深奧,其實他的說法是指人對足球、籃球、網球的熱愛,因為球藝精湛才能踢/投/打出完美的拋物線球!
而憤怒鳥的玩法,就正正會因為投擲而產生拋物線!
 
5. 要嚟Kill time!
等車、等人、等食、等入場,呢啲鎖碎的時間,無嘢做好似好浪費,
但如果呢啲時間用來打機,就變咗「有嘢做」喇!既可紓緩壓力輕鬆一下,又唔使無無聊聊企喺度發白日夢!
 
不過咁,即使憤怒鳥幾好玩都好,都唔好喺大伙兒聚會時,為咗避免同同枱嘅人傾偈而拎住部電話係咁篤!
記住,手機遊戲可以係朋友間的話題,但並唔可以代替人同人之間嘅交流啊!
LOAD MORE