停一停諗一諗,先好養寵物!

by TEXT:韋寶

我好記得同老公拍拖時的第一個聖誕節,佢打算買隻狗仔送俾我,好彩佢買之前漏咗口風,俾我阻截咗一場悲劇發生!點解咁講?唔好誤會,我超級鍾意狗仔,之不過:
 
1. 我有嚴重鼻敏感,每次同狗仔玩都會狂打噴嚏,口水鼻涕一齊流,慘過大傷風!
 
2. 我爸爸話養我已經夠煩,兼且佢一向都嫌狗仔有陣味,
所以如果我帶隻狗仔返去,佢應該會將我同狗仔一齊趕出街!
 
所以呢,如果你好似我咁嘅情況,而你本身又好鍾意貓狗,真係要提提你男友唔好買貓狗俾你做聖誕禮物!因為佢哋唔係一份禮物,而係一條生命!
我以前做寵物雜誌記者嗰陣,就親身見過被遺棄嘅狗仔有幾慘,所以如果你真係打算養佢哋,真係要停一停、諗一諗:
 
1. 佢哋除咗係一條生命,仲需要愛心同照顧,斷唔係你嘅玩具,鍾意就同佢玩,唔鍾意就轉贈俾人或者託人照顧!
曾經聽聞有人一時將寵物放喺管理處,一時俾朋友A暫託,一時放喺朋友E留宿,
如果你自問無乜責任感,真係唔好「害己害貓狗」。
 
2. 到底你對動物有無敏感?有好多人根本唔知自己對動物敏感,
我所指嘅唔單止係鼻敏感,仲有皮膚敏感同眼敏感!
 
3. 每種動物都有佢嘅特性,貓仔唔需要散步,不過狗仔就需要散步了!
而白兔天生鍾意咬嘢,最常見就係咬電線!所以呢,養之前要了解清楚那種動物的特性!
 
4. 你要有心理準備替寵物清理大小二便,
以及教導牠甚麼應該做甚麼不可以做(朋友隻狗仔就好鍾意摷垃圾桶同咬爛啲拖鞋),
你有這個時間、精神同愛心嗎?
 
5. 貓狗同人一樣,會生病、會老,要有無論如何都照顧佢一生一世的準備(包括心理準備和金錢,無錯,很實際的)。
 
6. 家人嘅意願當然都要考慮,唔好諗住先斬後奏,要先商量後行事!
仲有,家人係最清楚你性格,明知你養唔掂自然會忠告你!
好喇!如果真係決定養寵物的話,都唔一定要買嘅,領養仲有意義啦!
資料顯示,2007至2009年期間,被漁農自然護理署人道毁滅的動物約有13,000至18,000隻,平均佔該署每年接收動物總數的76%!但如果佢哋有你帶佢返屋企,咁就可以逃過被人道毁滅的命運了!
如果你都想領養動物,除咗「愛護動物協會」之外,仲有「南丫島動物保護組織」同「保護遺棄動物協會SAA」等等!
 
網址:
LOAD MORE