聽聽男生真心話

By COSMO

拍拖時,往往有很多事情令女生覺得困擾,但又唔敢開口問男友,有時問了也得不到令人安心的答案。到底是我們的「直覺」最信得過,還是只是我們「自己搵嘢煩」?即睇真相 !

困擾 1:佢去玩唔帶埋我去
真相是:首先,你要想想男友參加的是甚麼場合,如果是公司派對,或是一些不適合帶着女生出席的場合,例如一班男生去睇波、篤波、打機等等,唔帶你去係正常不過的事,一來怕你悶,二來男生們又玩得不盡興。除非佢去任何地方都借啲意唔預你,否則,真係唔使諗咁多。

困擾 2:佢會SMS或WhatsApp我,但又唔會打電話俾我。
真相是:很多男生都不喜歡講電話,更加討厭煲電話粥。如果佢係唔鍾意搵你,連send SMS或WhatsApp俾你都費事啦!

困擾 3:佢情緒大起大落,好大脾氣。
真相是:男生都會有情緒,唔好覺得發脾氣是女生的專利。將心比己,當你自己情緒跌落谷底時,少少事都可以令你一觸即發啦,係咪?男生亦然。下次遇到他心情唔好時,不要跟他硬碰硬,等他冷靜下來再算。當然,你可以搵機會同佢傾吓佢處理情緒的問題,不過如果你要經常Mon住佢,其實會令佢覺得你變咗佢阿媽囉!

困擾 4:佢話因為太愛我,所以想冷靜吓。
真相是:如果你們之間沒有甚麼明顯問題的話,原因好可能是他不想跟你發展長遠的穩定關係。因為太愛而想唞一唞,實在唔合邏輯,亦都唔係男生做事的一貫風格,一個男生如果好想同你一齊,初頭一定會瞓身演出,而且男生在感情上遇到問題時,通常都會採取得過且過的態度,絕少會咁「積極」提出任何解決方案。當佢講得出「想冷靜」,你們之間可能已經存在着很大問題,遇到這種情況,女生不如先重新檢討一下這段關係,再細心諗吓自己會唔會都想take a break。

困擾 5:他常常講其他女仔
真相是:這個是很普遍的現象,女生也經常講男仔,right?佢由女明星講到身邊的其他女仔朋友,並唔代表佢對呢啲女生「有嘢」,好多時只是想將其他人的事作為新鮮的話題。不過,如果你真係介意佢成日講其他女仔,就坦白話佢知,佢自然會識做。

 

LOAD MORE