12星座邊個最知慳識儉?

by Text : 占星師Jupiter (www.magiclife.com.hk)

12星座, 十二星座, 性格分析, 性格

錢要點樣花係每個人嘅選擇,有人豪氣非凡,有人計住計住,亦有人精打細算。12星座邊個又最知慳識儉呢?

第1位:金牛座

金牛座好着重物質上嘅安全感,成日覺得要累積多啲物質嘅嘢先會安心,但唔好以為金牛會因為咁而好揮霍、需要買好多嘢,反而佢會好識得衡量價值,乜嘢值得買、係咪耐用、價錢抵唔抵,都會諗得一清二楚。而佢所囤積嘅東西,分分鐘包括十幾廿年前買落嘅,用得唔好嘥。

第2位:巨蟹座

巨蟹座係典型會計「師奶數」嗰種,即係為咗慳一蚊幾毫,都會同人講價、四周圍格價,又或死都等到大減價先買。所以巨蟹都係嗰種會成日參加團購、儲優惠券、印花嗰種人,總之有得慳、買平咗,淨係呢個過程就會好開心。不過,有時巨蟹為咗家人,都係願意付出金錢嘅。

12星座, 十二星座, 性格分析, 性格

第3位:山羊座

山羊座相當精明理智,通常比較清楚自己要啲咩、乜嘢先係真係有用、有需要,而唔會亂咁花費。而買嘢之前,通常都會做吓資料搜集,睇吓一般價錢係幾多,或問吓人邊隻牌子、型號最好用之類。對於山羊座,最緊要實用。有時都會買名牌,但確保嗰樣嘢係耐用、自己會常用先買。

第4位:處女座

處女座係精明眼,而且唔鍾意浪費,加上生活係比較簡約style,認為應慳則慳,節儉都係一種美德。處女座比較着重物品嘅功能,例如買隻錶,只是用嚟睇時間,咁就唔使買啲咩奢華嘅嘢。調返轉,如果要買個濾水器,一定會精挑細選,比較各種功能同效用,如果效能好,俾多啲錢都會覺得值得。

12星座, 十二星座, 性格分析, 性格

第5位:水瓶座

水瓶座對於物質唔係有太大追求,所以一般都唔會要啲名貴或奢侈嘅嘢,啱用就得。不過水瓶座總會有啲好投入嘅興趣,亦願意為呢個興趣而用巨額嘅金錢。例如鍾意攝影的話,就會勁買各式器材; 又或如果最愛牛仔褲,都會願意花幾千蚊買條褲。

第6位:天蠍座

天蠍座喺花錢方面係比較極端,有時可以非常慳儉,咩都可以不買,又或者喺殺價時殺得好凶,但有時心血來潮,又會嚟個瘋狂血拼,所以好視乎佢嘅心情,又或視乎佢當時嘅理財需要。例如佢突然下定決心要儲蓄或還清債務,食一個麵包當一餐也可以。

12星座, 十二星座, 性格分析, 性格

第7位:天秤座

天秤座天生就鍾意靚嘅嘢,大部分嘅錢都係用喺衣服飾物、鞋子手袋、化妝品、護膚品呢啲嘢上面,叫最愛shopping 嘅天秤慳啲駛實在唔容易。天秤唯一嘅好處係比較理性,起碼唔會太過份,到咗某個位就會stop自己,攞返個平衡。

第8位:雙子座

雙子座充滿咗好奇心,鍾意追潮流,咩都想試,只要有新產品,雙子就會忍唔住想買,特別係電子產品,電話、電腦、或各式功能多多又特別嘅電器,雙子都忍唔住手。所以叫雙子知慳識儉都幾難,最慘係玩一陣又厭,轉頭又去買新嘢試。

12星座, 十二星座, 性格分析, 性格

第9位:白羊座

白羊座係衝動一族,往往行動快過思想,所以買嘢好難經過深思熟慮,特別係當佢覺得一定要快過人,唔可以執輸的話,就更加衝動,分分鐘連嗰樣嘢係咩、有咩用都唔知,就會衝動俾錢。例如嗰啲限量版,又或限時減價嘅嘢,白羊座係無抵抗能力。

第10位:人馬座

人馬座天生就係任性同慷慨(唔理有錢無錢),見到鍾意嘅嘢就想擁有,而且買一件唔夠,有時更會同一款式買幾隻色等,加上人馬座非常討厭束縛,你叫他停一停諗一諗,又或做個預算規範自己、收埋張信用咭,他會覺得痛苦萬分,所以就俾佢花吧。

12星座, 十二星座, 性格分析, 性格

第11位:雙魚座

雙魚座對錢根本無咩概念,你叫佢知慳識儉,佢都唔知點做好。雙魚座做事都係憑感覺,鍾意就買,亦容易受人影響,俾售貨員游說又買,見朋友推介又買,你問佢買咗幾多錢佢又答唔到你。更多時候很容易買咗返去之後,先發覺自己一早買咗個一模一樣嘅。慳錢?都係算吧啦。

第12位:獅子座

獅子座係土豪嘅代表人物,要氣派要面子,又要豪氣,買嘅嘢都要係牌子嘢,又鍾意奢華嘅感覺,吃喝玩樂去旅行都要好嘢靚嘢,而且對人更係要大方同慷慨,買禮物送人都唔失禮,請人食飯最緊要夠豪有面,如果叫獅子知慳識儉,佢反而覺得咁樣係寒酸同無面。

LOAD MORE