1.之前去日本公幹,因為驚而瞓唔着,突然間,feel到床褥裏面郁郁下,驚到心都離一離,心諗:唔係咁猛呀⋯⋯佢住喺張床入面⋯⋯而真相係⋯⋯

其實係地震囉,因為「浪」咗幾次後個牆角「嘞」一聲,嗰刻我就意會到係地震。(但驚咗好耐先發現嘅⋯⋯)第二日有行家表示:「我尋晚以為有鬼,衝咗去隔離房!」原來,誤會嘅不獨我一人!XD

2.又有次,同樣係公幹,事發地點係濟洲某酒店。由於我住嗰層係地庫,感覺有啲陰森,所以未瞓覺時都驚驚哋⋯⋯

而喺準備瞓嗰刻,門口盞燈熄咗⋯⋯嚇到我即刻用張被圍實咗自己⋯⋯驚咗大半晚先瞓着⋯⋯

第日同公關講返,佢話嗰個係慳電嘅措施⋯⋯佢間房都係咁嘅⋯⋯(小編覺得自己好傻仔,但喺呢次之前,真係未遇過有慳電裝置嘅門口燈,又或者係有人同自己一間房時,就唔會咁留意⋯⋯)

3.最近去首爾出trip,一返入房,發現喺洗手間抹完手、擺喺枱上嘅毛巾唔見咗,當堂內心發毛,不過經過咁多次自己嚇自己嘅經歷,小編同自己講:「冷靜啲!」

再行入去,意⋯⋯對拖鞋都唔係喺啱啱嗰個位嘅⋯⋯再次叫自己冷靜!(幸好當時係下午,間房仲好光猛)

再望一望擺放生果張枱,好似多咗包曲奇餅,應該係酒店職員入嚟擺低包曲奇餅,跟手幫我整理咗一下房間!(雖然小編唔明點解唔一早放埋曲奇餅,係喺我check in 後先放入嚟⋯⋯)

4.呢個係發生喺小編嘅朋友身上,事發喺內地酒店,佢話瞓瞓下聽到女人喊聲⋯⋯

膽生毛嘅佢,就起身睇下啲聲喺邊度嚟,最後發現係隔離房嘅電視聲⋯⋯(如果嗰個係小編,應該又會嚇到大半晚都瞓唔着⋯⋯)

所以膽小鬼們,下次唔好驚定先,冷靜啲,好多時都係自己嚇自己呀。(touchwood XD)

LOAD MORE