日本直送食材!鳴門X東京「G麵7」期間限定拉麵店

by 韋寶

小編每次去日本,都一定會食幾餐拉麵,因為喺日本嘅拉麵總係好食啲嘅!而鳴門集團為慶祝十周年,特別邀請咗東京橫濱著名拉麵店「G麵7」合作,將鳴門變身成「鳴門x G麵7」期間限定聯乘拉麵店!

即日起至2016年10月15日,你可以喺呢間期間限定拉麵店食到「G麵7」主理人後藤將友嘅拉麵品牌,包括「G麵7」、「口麵ズ」及榮獲2015年米芝蓮推介嘅「啜磨專科當中最受歡迎嘅6款拉麵!
好多人都會擔心喺香港食唔返喺日本食到嘅質素,不過是次嘅食材同麵條都係由日本直送嚟香港,務求令大家可以食到橫濱嘅質素!

當中最吸引小編嘅,係鹽味巴馬火腿蒟蒻冷麵($98),因為入面有兩款麵條,包括小編勁like嘅低卡路里蒟蒻麵,質感爽口,食落超清新。

加上店家有咬口嘅拉麵,巴馬火腿同鹽味湯底,真係夠晒特別!食過之後,搞到小編心思思好想再食!

鰹魚油正油沾麵($108)係小編嘅第二最愛,佢係由米芝蓮推介、「啜磨專科」嘅沾麵演變而成,特別加入咗鮮甜嘅鰹魚油,令沾麵汁滲透魚香。

小編最like嘅係佢個湯濃得嚟唔會好鹹,因為坊間唔少沾麵嘅湯底都偏鹹甚至過鹹啊!

呢款正油拉麵($98)係日本三間拉麵店中最暢銷嘅拉麵,醬油選用5款唔同嘅日本醬油調製而成,湯底清澈得嚟唔係淡而無味,配上自家浸煮嘅雞髀肉同叉燒,唔錯唔錯!小編尤其欣賞個叉燒,都幾入味(因為小編覺得坊間拉麵店嘅叉燒真係唔係間間都好食)!

南瓜花生醬雞肉冷麵($98,嘅靈感,係改良自中華冷麵嘅Fusion新派冷拉麵。佢以南瓜茸同花生醬作為醬汁基調,配以惹味、自家製嘅洋蔥黑蒜油,組合非常創新!

至於巴馬火腿味噌脆冷麵($98),佢嘅味噌湯底採用三款唔同濃度嘅日本味噌調製而成,味道濃郁,配菜設新鮮秋葵,以及以白酒浸漬嘅車厘茄,仲特別加入脆麵增加拉麵嘅口感!

而雞節鹽味拉麵($98 )入面嘅雞節係以九州鹿兒島嘅雞隻、採取雞胸部位曬乾而成,味道好似鰹魚花,但口感就唔同,咁做係想無咗鰹魚花嘅酸味,至於湯底係清得嚟又幾香嘅!

鳴門X東京「G麵7」期間限定拉麵店
日期:即日起至2016年10月15日
地址:銅鑼灣軒尼詩道489號銅鑼灣廣場一期201號舖
電話:2891 6800

LOAD MORE