心理測驗:你老年時會幸福嗎?

by TEXT:Juju edited by double p.

將來會點?好多人都想未卜先知,關於愛情/婚姻,將來會點你想唔想知?嗱,心理測驗嚟啫,唔敢話一定準,不過玩下又無妨吧!

 

心理測驗:你老年時會幸福嗎?

而家喺你面前有張爺爺嫲嫲嘅合照,你爺爺個樣就比較嚴肅,而你嫲嫲就好好笑容,試想像下你爺爺雙手會點擺?

A. 手放前面

B. 手放背後

C. 拖住嫲嫲

D. 在揮手

選A:積極尋找快樂型

你個性喜歡自然,思想開明,老咗應該唔會變老頑固,會保持積極嘅人生態度,同另一半一齊搵啲活動玩下,培養啲共同興趣。

無錯,就好似人哋成日羨慕嗰啲老夫老妻咁。你有時會鍾意同另一半鬥下嘴,不過到大家年紀有返咁上下,呢啲反而係情趣嚟。

選B:家庭為重型

年輕嘅你大概都比較鍾意青年才俊型嘅男生,假如真係同咗一個事業發展得唔錯嘅人共諧連理,你會好願意為家庭犠牲,以家庭為重,打點好一切,默默支持另一半嘅事業發展。

不過到你另一半完全退休之後,唔習慣、生活失咗平衡嗰個反而可能係你,所以無論你而家/將來係一個幾稱職嘅家庭主婦都好,都要記得培養個人興趣,俾啲Me time自己。

選C:越成熟越有味道型

有一種女人,年紀越大越有魅力,越睇越順眼,你就係呢類型。等你年紀大少少,你分分鐘比後生時更有吸引力!

由於你無論個心同外表都減少咗後生時嘅躁動不安,更淡定同有智慧,你同另一半嘅關係反而會更為親密,培養出一套你哋專屬嘅溝通默契,一個眼神、一個細微嘅動作,你都已經知道對方嘅心,盡在不言中。

選D:唔認老型

你個性比較強,年輕時傾向將精神放喺追尋個人理想上,活得有無意義對你嚟講好重要。由於你唔會認老(或唔記得咗自己已經唔係廿幾歲),所以就算上咗年紀,都會同啲後生四圍去玩,唔鍾意坐喺屋企睇電視,你呢種個性喺家庭中反而會更受人敬重。

如果你另一半都係咁就good啦,但如果咁啱佢唔係,亦唔好迫佢,如果唔係就會成日為啲小事傷和氣,留返啲氣力去玩好過啦!

LOAD MORE