初約會之話題Dos & Don’ts!

by juju

啱啱開始約會,梗係會對對方有啲好奇、想知對方多啲嘢,不過想了解對方,又唔代表一定要樣樣嘢兜口兜面問嘅,太直接有時反而尷尬,順其自然就梗係最自然啦!

忌講

1. 結婚計劃:

每個單身人士一俾人問呢嘢,通常都會即刻緊張起嚟,提高防衛心,咁係會影響你哋傾偈嘅氣氛!

2. 拍過幾次拖 / 關於前度:

雖然講呢啲嘢會係一個豐富嘅話題,但都係啲過去咗嘅嘢嚟,對一段新展開嘅感情無乜貢獻,而且大部分男生都好怕俾人問關於前度嘅事,不斷追問就更加會嚇親佢架!

3. 幾錢人工:

明架啦!雖然你可能唔會咁問人,不過世界上真係會有人問出口嘅,咁問一來尷尬,二來對方會覺得好突兀,亦可能會覺得你用人工去衡量佢係咪值得交往。

宜講 

1. 如果任何一方有好投入嘅信仰、屋企養咗10隻貓、食素等,都應該一開始就俾對方知道,如果到關係發展得比較認真先講,就可能會引起不必要嘅爭拗,同埋到嗰時先發現對方接受唔到,就會浪費咗大家嘅時間啦!

2. 夢想、與趣、對將來有咩展望,呢啲話題係幾時都唔會有傷害性 / 悶,你仲可以從中睇下大家嘅諗法夾唔夾添。

3. 如果想氣氛輕鬆啲,可以講下返工/ 讀書嗰陣嘅趣事。

CG! Tips:

有時傾偈嘅內容唔係最重要,而係喺傾嘅過程中,觀察對方點樣去表達、有咩情緒、用咩語氣、對各種人事物嘅態度,你可以喺呢啲嘢裏面了解到佢好多嘢架!

LOAD MORE