結婚前要問嘅7件事!

by juju

打算同另一半拉埋天窗、組織家庭係一件開心事,但係都唔可以一味淨係期望美好嘅事來臨,每個人嘅人生裏面總會遇到難關,兩個人係咪決心一齊過,真係需要諗清諗楚。

問自己

1. 準備好未?

你決定好同呢個人過埋下一世未?感情嘅嘢,有時除咗愛,仲需要其他條件嘅輔助去應付問題,你係咪完全無猶疑?

2. 有幾必要? 

結婚呢回事,有人慢慢嚟,有人好心急,你哋屬於邊種?趕唔趕?點解趕?點解唔趕?問清楚自己,可以幫到你去做決定。

3. 點解咁做? 

人人結婚嘅原因都唔同,有啲係因為家庭壓力、另一半嘅壓力,亦可以係因為年紀問題、覺得唔結無乜安全感等等,清楚知道自己嘅動機,衡量過,先再行出呢一步都唔遲。

4. 你想要一個怎樣的家? 

每個人心目中嘅溫馨的家都未必同一個樣,有人想要小朋友,有人唔想,喺你自己心目中,一個理想嘅家係點嘅樣,而你另一半又係咪一個理想嘅主理人 ?

問大家

5. 夠唔夠錢?

呢個問題好現實,但一定要傾清楚,結婚係要使錢嘅,無論係「豪」結定「簡」結,大家一定要取得共識,甚至要同雙方屋企人取得共識!

6. 幾十年後會點? 

有人鍾意安安定定,有人鍾意不斷試新嘢,呢一點你哋要有明確嘅共識,坦承俾對方知道,對於居住環境、事業發展、人生追求呢啲方面,個人嘅彈性有幾大,了解咗先可以picture到打後幾十年嘅生活應該點規劃。

7. 要唔要小朋友? 

將來要唔要小朋友,最緊要雙方有共識。但假如大家都打算要小朋友,婚前最好討論一下教育方針,如果事與願違,大家有咩睇法同打算。如果兩個人對下一代嘅睇法分歧好大,係可以好傷感情架。

LOAD MORE