從便便了解身體狀況

By COSMO

便便並非淨係BB仔嘅問題,亦係每個人嘅問題,便便嘅形態反映咗我哋嘅身體狀況,話俾我哋知自己需要啲咩!

1. 細細粒、硬硬哋:
表示便便留喺腸道太耐,水分被重新吸收咗,需要食返多啲含纖維食物喇!

2. 浮水:
食咗好多豆、黃芽白類蔬菜或食咗大餐,都會出現呢個情況。

但如果呢個情況經常出現,就要搵醫生睇下係咪有啲咩問題影響咗身體吸收脂肪嘅能力。

3. 水狀、海藻綠色:
有時食咗抗生素,殺死咗啲好菌,俾腸內嘅某隻壞菌有機可乘造成感染就會有呢個情況,最好同醫生商量下點處理。

4. 鉛筆咁幼:
如果長期都係咁,就要睇醫生,可能係結腸出咗問題,迫住咗啲便便。

咁到底正常嘅便便係點?
1. 形態應該好似一條香腸或一條蛇咁,表面光滑、較軟身。

2. 顏色正常係啡色,如果有紅色或黑色加腥臭味,可能係身體有出血問題;

不過又唔好自己嚇自己,見到便便顏色唔同咗,諗下自己食過啲咩先,紅菜頭、深綠色菜葉、肉類都會影響便便嘅顏色。

3. 每日去1至3次都屬正常,有啲人每食完一餐之後就會便便,但如果1星期先去得兩次,或1日去成5次以上,就有問題喇,建議去睇醫生問一問。

LOAD MORE