生理上嘅原因:

1.調整位置:

男生睪丸、陰莖嘅位置夾喺兩腿之間,平常人又唔會戴護陰 (某啲運動員例外),佢哋又冇啲好似胸圍嘅東西去固定住個位,所以喺日常郁動裏面,佢哋嘅生殖器官不時會移位,於是佢哋習慣性到時到候要調整下。

2.散熱:

如果出咗汗、著嘅底褲或面褲質地比較侷,嗰個位會唔舒服,情況同腋窩差唔多,不時拉一拉啲布料,感覺會舒服啲。

3.搲痕:

男生做呢個動作,同我哋有時身體忽然間有個位好痕、唔搲唔安樂一樣,有時係心口,有時係手臂,有時係背脊,就睇你會當眾搲、靜靜雞搲,定去廁所搲。

心理上的原因:

1.保護自己:

生殖器嘅位置可以話係男性身體最脆弱嘅部位,而同時又係好重要嘅位置,所以喺潛意識上,男生會不時伸手去嗰度,確定自己嘅安全。

2.宣示地位:

喺進化裏面,雄性動物指住自己生殖器呢個動作,即係表示 「我係大佬!」,時至今日,男性可能仍然有意識或冇意識地做出呢個動作。

如果男友經常不自覺咁做出呢個動作,除咗開聲提佢,你仲可以:

1.送新底褲:

揀啲合身、透氣度高、包得住成個屁股嘅款式,如果佢著開孖煙囪,可以買boxer brief (平腳、似孖煙囪,但質地係有彈性嘅棉質)。

橡筋著到鬆晒嗰啲,想條底褲唔成日移位都幾難,勸佢唔好再著喇。

2.揀過啲褲:

如果有啲褲嘅質地又厚又侷,或者「弟弟」位置箍得太緊,佢都會著得唔舒服,唔舒服自然就會伸用去整,下次陪佢買褲時,不妨幫佢揀啲褲襠鬆緊度適宜嘅款式。

p.s. 呢個世界當然會有啲鹹濕佬故意做出不雅舉動,對呢啲人就唔使客氣喇!

LOAD MORE