8樣男生討厭女生做的行為!

By COSMO

如果你想成為男生心目中嘅可愛女生,有8樣嘢你千祈唔好做!

1. 喺公眾場合扭計

二人世界時,你點野蠻、扭計,佢都唔介意哄你、陪你癲,但响佢啲朋友面前,你依然故我,會令佢好尷尬同無面,你知啦,男人响出面要型嘛。

2. 扮高竇

男生要你俾好多提示先夠膽約你出街,除非佢100% sure你會say yes,否則佢一定唔敢行動,所以如果你扮高竇唔俾暗示佢,佢係唔會識做!

3. 扮同佢志趣相投

無論佢有咩嗜好,你都唔使刻意附和。試諗吓原來佢都係為咗討好你先扮鍾意睇某套電影,咁係咪好搞笑?

4.煲好耐電話粥

女生用電話傾心事,但大部分男生只會用電話傾重要嘢,通常都係講唔夠10分鐘就想收線。所以打電話俾佢時說話要精而簡,唔好過分長氣。

5. 做跟得女友

男生鍾意女友隨傳隨到,但討厭去到邊女友都跟住自己。例如佢同朋友出街,你就唔好係都要跟埋去,俾返啲私人時間佢。

6. 故意令佢妒忌

以為同其他男生flirt可以逼佢對你採取主動?你咁諗就大錯特錯!咁樣反而會令佢覺得受到傷害,甚至羞辱。

7.打扮過分性感

男生佔有慾好強,所以大部分男生都唔會想自己女朋友着得太過性感,驚你太招搖,但如果係其他女生,佢哋就會想人哋越着得少就越好!

8. 經常大變身

得閒將個頭染紅染綠、剪短又駁長,本身係斯文女,無啦啦走去行punk路線,除咗好容易會變錯身,仲有機會嚇怕佢,因為男生最驚轉變。

LOAD MORE