殺死愛情!約會不宜做的6件事

by juju

我哋硬係唔會覺得次次約會都要有下次,雖有啲對象,我哋自己都唔想有下次,但係對於嗰啲明明好地地、都唔錯嘅,見咗一兩次就無聲無息咁消失咗,就會覺得有啲奇怪囉,不如喺腦海中「案件重演』一下,睇下自己有無做過以下容易令人失去興趣嘅行為?

1. 認真咗:有時人太習慣處於「做嘢博殺』mode,到約會嗰陣一時轉唔返過嚟,依然好似返工嗰個自己咁,認真同對方討論邊啲嘢啱/邊啲嘢錯、要話事、乜都講成本效益。

其實咁樣好容易會嚇親對方,約會應該拿出自己輕鬆、好玩嘅一面,有時傻傻哋會更可愛。

2. Like多咗:你哋可能互相add咗Facebook,你有無表現得太supportive,佢講乜、share乜你都like下、comment下?

可能你平時對好多朋友都係咁,但如果你同個約會對象本身唔係咁熟,佢可能會覺得你過分熱情。

3. 講多咗:覺得可以同約會對象開懷傾偈係事,但係都要控制分享嘅深入度,有啲嘢唔適宜一次過講太多,例如屋企吵吵鬧鬧嘅家事、以前同啲咩衰人拍過拖等,呢啲都可能會另對方覺得too much。

4. 問多咗:想了解對方多啲,唔等如好似面試咁問好多問題,問得太仔細、深入,有可能會令人唔自在,例如問人工、前度、政治立場等,最好將問得空泛啲,俾空間對方選擇答啲乜。

5. 飲大咗:飲少少酒係會放鬆啲、好傾啲,但你有無一時唔覺意飲多咗,然後酒後失態,如大聲講嘢講唔停、大笑大喊、胡言亂語之類?

6. 掛住望電話:呢一點有啲人明明係咁都唔肯認,回想返自己喺約會中有無經常睇電話,覆message,甚至post Facebook update,例如掛住相機先食,然後「順手」擺埋上Facebook,因而忽略咗對方?

LOAD MORE