川島小鳥作品展!LEE GARDENS「聖誕藝術村」展覽

by Alva L.

聖誕節係「愛與分享」嘅節日,LEE GARDENS最近喺呢個特別日子邀請咗來自日、韓、英嘅四位藝術家,喺Hysan Place、利園一期、二期同利舞臺展示個人藝術品,俾大家喺鬧市中走過時可以慢慢欣賞!當中最曯目嘅係希慎前嘅「小確幸寫真館」,同埋利園嘅蜷川實花作品展。

小確幸寫真館

呢間位於Hysan Place嘅小木屋,係日本攝影藝術家川島小鳥首個喺香港舉行嘅個人相展,佢最擅長人像攝影,所以「小確幸寫真館」會以「愛家庭、愛朋友」為主題,向大家展示愛與溫情。

小確幸寫真館

透明嘅小木屋喺夜晚開住一盞盞昏黃小燈,好有溫暖嘅感覺,行過時已經俾佢吸引住!

小確幸寫真館

今次相展將會展出川島小鳥最為人熟悉嘅作品,包括2011年大熱相集《未来ちゃん》 ,一齊同大家見證可愛小未来每個成長時刻。

包包同Angela。

未來。

小確幸寫真館

仲有2014年推出嘅相集《明星》,呢本相集以台灣為主題,捕捉台灣嘅人情風味。

攝影師希望發掘呢個城市嘅幸福點滴,所以特意嚟到香港,走訪大街小巷,仲搵嚟可愛嘅「包包」徐心怡(徐榮女兒)、文青女神袁澧林(Angela)成為鏡頭下嘅模特兒,製成《幸福》相集。

攝影師為香港拍攝嘅6幅地道小確幸相片,會製成限量版明信片作慈善義賣。

只需捐款港幣$100或以上,即可獲贈「川島小鳥香港限量版明信片」乙套(共6張),極具收藏價值架。而且明信片嘅收益將會全數撥捐「香港展能藝術會」添!

蜷川實花藝術展

除咗川島小鳥嘅「小確幸寫真館」,同樣嚟自日本嘅蜷川實花都會喺利園前展出作品,相信大家一睇藝術展外面已經認得係佢喇!

至於藝術館裡面亦都同樣充滿蜷川實花味道,好夢幻!

大家仲可以入去「萬花筒」世界影相,影出嚟好靚架!

Christmas Galleries at LEE GARDENS 聖誕藝術村

另外,「聖誕藝術村」仲會有嚟自英國嘅Rebecca Louise Law,以及嚟自韓國嘅Chang Hwan Kim嘅作品架!

LOAD MORE