一吃傾心!真.紫薯火鍋 + 煲仔朱古力心太軟

by 韋寶

小編之前都介紹過呢間超有誠意嘅小店,因為店主會不定期推出新口味嘅自家製雪糕乳酪,而且用料好足,好似紫薯甜品,就用上大量真紫薯嚟整。而近來店家仲出咗幾款冬季限定嘅產品,款款都好誘人!

甜蜜紫薯冬日火鍋 $188

呢個甜蜜紫薯冬日火鍋真係超有heart,當中嘅自家製紫薯醬,有7成係以新鮮紫薯整成,加埋白朱古力,質感濃稠。而紫薯雪糕同樣係自家製,有6成係以新鮮紫薯製成,一食落口,幸福感隨即滲出,小編最欣賞嘅係,兩者嘅紫薯味香濃得嚟唔會好甜。

除此之外,窩夫、麻糬、Chocolate brownie都係店家整嘅,配埋生果、棉花糖、朱古力威化餅、日本迷你紫薯,忌廉泡芙同朱古力脆條,真係非常滿足架!(生果款式或會轉換)

火鍋包括兩杯玫瑰荔枝茶,個茶睇落無乜特別,但飲落好香玫瑰荔枝味,有叮一聲嘅感覺,配埋火鍋就可以減低甜膩感啦!

惠顧呢個火鍋,可以加$18購買雪糕3球,口味視乎供應而定。

溫馨提示:呢個火鍋係限量發售架,可致電預留。

煲仔朱古力心太軟 $88
心太軟同Chocolate brownie同樣係以70%比利時朱古力製成,配以Chocolate brownie、棉花糖,忌廉泡芙同生果。(生果款式或會轉換)

將配料點落個心太軟食,有朱古力火鍋嘅效果之餘,又可以食到心太軟,一次過滿足你兩個願望!

老薑番薯糖水伴芋圓$34
入面嘅芋圓、地瓜圓同紫心蕃薯圓都係店家自製,店主特意整咗唔同嘅口感,芋圓、地瓜圓就較煙韌,紫心蕃薯圓就較軟身,加埋番薯、紫薯粒,薑水同片糖,啱晒冬天食呀!

綿綿焗吐司 $38
灑上蜜糖嘅綿花糖下,係蜜糖吐司粒配杏仁片同麻糬,集脆、軟、煙韌嘅口感於一身!

抹茶蜂蜜乳酪甜筒 $12
呢個雪糕乳酪係以台灣蜜糖同台灣抹茶粉整成,好濃蜂蜜味呀!

想甜嚐甜

地址:黃大仙蒲崗村道73號富佑大廈地舖

電話:3956 4744

LOAD MORE