每個人都會經歷的29+1!

by juju

最近女生睇咗電影《29+1》,紛紛大叫有共鳴,亦有人表示驚驚,無可否認,對唔少女生嚟講,話自己「廿幾」易開口過「三廿幾」,不過其實一個女人嘅美,從來都係由個心度滲出嚟,「三字頭」及打後,可以越來越美!


1. 經驗累積出嚟嘅智慧

到咗三字頭,你會發現自己做女時硬係避免唔到嘅錯誤,喺呢個時候你已經可以輕鬆駕馭咁處理,工作點分緩急先後、家居有咩壞咗唔會panic、啲錢同時間點樣用先有價值,你都開始有把握,呢啲種種都俾到你結實嘅安全感去面對人生,少咗好多細個時嘅無力感。


2. 越睇越有味道

打扮上嘅唔同style,你做女時已經試過玩過,呢個時候你好清楚自己身型嘅輪廓、心理狀態,用短時間就決定到自己喺咩場合著咩最適當最滿足,唔使再攤晒全衣櫃啲衫褲鞋袋出來都無從入手。

無錯,皮膚質素、體力、新陳代謝呢啲身體機能上嘅嘢都會有轉變,但邊個唔會?呢個反而係接受自己、接受生命嘅好時機,每個人嘅身體都係世上獨一無二嘅,世上靚人多的是,其中越了解自己嘅人越美。


3. 懂得投資寶貴嘅時間

進入三字頭,身邊無無謂謂嘅是非、爭拗會少咗一截,以前你因為唔好意思、唔知點拒絶而俾佢哋埋到身嘅無謂人、無營養嘅親友/感情關係,你比以前更有力量、技巧去同佢哋保持距離,以保護自己嘅人生。


4. 感情更順利

唔係個個女生細細個就好清楚自己想要啲咩/需要啲咩, 有時就係要到進入「唔介意人哋點諗」嘅人生階段,你就會為自己發聲,唔俾自己啞忍一啲唔公平唔合理嘅對待,唔再嘥時間喺一啲唔值得嘅關係上。

LOAD MORE