清脆分手的6個法則!

by Text: juju

分手最怕拖泥帶水唔清唔楚,徒添煩惱同痛苦,既然已經決定分手,適宜盡量以將傷害減到最低為大前提,做足一啲步驟、揀啱timing,點都好過就咁Whatsapp「分手」 兩隻字就算。

1. 第一個俾佢知

大家一齊得,佢有權第一個知你要分手,呢件係你哋兩個人嘅事,千祈唔好就咁喺facebook宣佈單身,佢見到你改status先知自己被分手,或周圍個個fd都知而當事人自己都未知。

2. 唔拖得亦唔急得

如果去意已決就唔好拖,但幾時講都要睇時機,如果咁啱嗰日佢本身已經好黑仔,你再提出分手,情況可能會更惡劣,最好搵個大家心情都平靜嘅時候講。

3. 原因要明確

講出一個主要原因就夠,最好係一啲大家一直都知又解決唔到嘅嘢,唔好一輪嘴列出一大推分手理由,將事情複雜化,咁盞撩交嗌或搞到傷害更深。

4. 立場清晰

講出口之前要肯定自己諗清諗楚,提出時,要明確表達你係「提出」分手,而唔係問佢意見,或者俾啲假希望佢,咁做對對方唔係咁公平。

5. 誠懇聆聽

俾空間對方講下佢嘅諗法同感受,你未必幫到佢啲乜,但起碼俾機會佢表達,如果佢提出一啲你嘅不是,唔好爭拗、互相埋怨,承認你都有責任同唔完美嘅地方,始終一段感情出咗問題,兩個人都有責任。即使對方喊、大聲指摘,你都要盡量保持平靜,鬥大聲係無意思嘅,等佢情緒平伏返少少先再繼續傾。

6. 保持距離

如果肯定大家無機會復合,提出分手後,盡量唔聯絡對方一段時間,以免引起不必要嘅誤會,等大家情緒定咗落嚟,接受咗事實,將來仲係咪朋友,就留返俾將來決定啦!

 

 

 

 

LOAD MORE