下體不再痕癢!6個小貼士預防念珠菌感染

by juju

唔少女生對念珠菌感染都唔會陌生,下體痕痕勁唔舒服,有事就梗係要睇醫生食藥,不過日常都可以由生活習慣入手去預防架!

念珠菌感染係...

其實係一種真菌,喺正常情況下,女生陰道本身存有少量念珠菌,但當陰道嘅酸鹼度有所轉變時,念珠菌嘅數量增多,受感染嘅機會就會提高。喺正常情況下,女生同男生嘅生殖器官中都會有少量念珠菌架!

常見症狀包括陰道分泌增加、變黃、呈芝士狀,外陰痕癢,陰道疼痛,或性交時感到不適。一般嚟講求診後醫生會採取藥物治療,如陰道塞藥、外用藥膏或口服藥物等。

6個預防小貼士

1. 注意個人衞生

沖涼洗下體時,使用溫和嘅肥皂或清水,記得要沖乾淨。去完洗手間,用紙巾清潔時,記得由前向後抺,避免將真菌或細菌帶到陰道。經期時,勤換衞生巾。

2. 選擇通爽內褲

最好選全棉,唔好太緊身。另外容易焗住啲濕氣嘅緊身褲都可免則免。

3. 避免香劑

避免使用加咗香味嘅廁紙或衞生巾,呢啲香劑可能會造成刺激。

4. 游完水即換泳衣

著泳衣落咗水,就唔好著住咁耐,俾啲濕氣噏住。

5. 均衡飲食

多食水果、蔬菜、全麥食物。如果有糖尿病或家族有糖尿歷史,就要注意控制血糖水平,可減低感染機會。

6. 勿胡亂使用抗生素

抗生素有可能影響下體嘅生態平衡,咁當然如果醫生認為有必要用抗生素,就要跟足指示食啦。

LOAD MORE