更了解佢!靠耳朵聽出個性

by juju

想了解多啲其他人,除咗用眼睇人之外,其實仲可以用耳聽!一個人習慣用咩聲線語氣、講嘢速度等等,或多或少都透露出佢個性嘅一二! 

講嘢時俾人感覺:
A. 速度快,又多嘢講
B. 嬌聲嗲氣
C. 聲線沉穩、清楚,不徐不疾
D. 壓低聲線,或者帶少少沙啞



分析:

A. 心急而簡單型

講嘢速度快、內容多嘅人,通常都係心急型,有時係因為佢哋個腦轉得快過把口,所以想急急用說話表達出嚟。

呢類型嘅人個性熱心,對朋友重義氣,但係記憶力就唔係幾好,有咩開心同唔開心嘢,當時可能反應好大,但係佢哋好快就唔記得咗,屬於大情大性型。



B. 依賴型

每個人身邊總有一兩個呢類型嘅朋友,平時無事無剩都係用啲超軟語氣、拉長尾音同任何人講嘢,一句兩秒講完嘅「唔該晒」 出自佢哋把口會變成5秒嘅「唔該晒~~~啊~~喔~~~」。

佢哋好鍾意一大班人嘅熱鬧,交際手腕高明,識講嘢、識睇人眉頭眼額,但係遇到大事,佢哋總係想依賴,請其他人去頂。



C. 自立型

呢類型人有主見,佢哋好清楚自己要/唔要啲咩、咩適合/唔適合自己,所以睇起上嚟佢哋好似唔係好接受別人意見。

凡事自己靠自己、有問題盡量想辦法解決係佢哋嘅人生哲學,所以佢哋亦俾到獨立自強、有啲壓抑嘅感覺人。



D. 態度鮮明型

呢類型人個性鮮明,唔會掩飾自己,忠於亦樂於做自己,屬於有創意型,有自己一套嘅衣著、生活品味同態度,自成一格,通常佢哋都幾追求美感(即是貪靚),佢哋嘅個人打扮、家居佈置等總係令人眼前一亮!

LOAD MORE