婚紗照都高貴大方，要一直幸福快樂，Keep Sweet 啊！
香香孕照甜蜜性感
岑麗香尋日上載同老公一齊影嘅大肚照，照片中香香散發著嫵媚感，準媽媽一副幸福嘅樣子實在係羨煞旁人！
單人照都一樣性感迷人，呢位準媽媽太美了吧！
陳凱霖大曬孕照拍攝花絮
用美美孕照放閃嘅又點止香香一個，尋日Grace都公開上載咗之前拍攝孕照嘅花絮片段。影片中見Grace以3個造型示人，包括性感吊帶長裙、一字膊長裙，以及黑色單膊長裙，3個造型同樣仙氣十足，加上甜美嘅笑容，完全感受到嗰種滿滿嘅幸福！
胡杏兒感謝大小情人
前面兩位準媽媽就用孕照放閃，已經做咗媽媽嘅就post前世情人同今世情人放閃！胡杏兒上載咗老公同仔仔合照，並寫到「To my Big and Little Boyfriends, Happy Valentine’s Day！」老公同仔仔搞鬼嘅樣子實在太可愛啦！
陳智燊宋熙年三口子的幸福
陳智燊上載家庭照並表示仔仔同老婆宋熙年係佢嘅快樂來源，要多謝佢哋兩個令自己成為呢個世界上最開心嘅人。
老婆宋熙年同樣上載家庭照，兩個人親吻仔仔嘅面珠墩，更講笑寫到「＠chanjason_ is third wheeling...」表示老公先係電燈膽呀！
霸氣男友袁偉豪
之前留言護花事件，網民已經話阿Ben係霸氣男友，會挺身為女友張寶兒發聲。霸氣男友又點會放過情人節放閃嘅機會！袁偉豪尋日上載咗同張寶兒嘅照片，照片攝於早前賽車慈善賽，照片中見到阿Ben對寶兒呵護備至，二人有講有笑，甜蜜指數爆燈，小編表示睇到呢度已經盲咗啦！
張繼聰創出放閃新境界
你可能以為放閃嘅方法都係不外乎個幾種，咁你就錯啦......張繼聰尋晚上載於尖沙咀碼頭自彈自唱「每天愛你多一些」嘅短片，表示呢個係比老婆謝安琪嘅小驚喜。佢話老婆表示唔要物質嘢，所以決定帶阿Kay去尖沙咀碼頭，然後問正在Busking嘅人借結他同其他儀器去演奏一曲冧老婆！
更寫到希望呢個「難忘嘅冧豬嘅幾十年後都記得」。片中見到阿Kay嘅冧樣可見呢個驚喜同冧豬方法十分成功，所以話放閃方法沒有最誇張，只有更誇張！
黃翠如蕭正楠低調放閃
高調有高調放閃，低調都有低調放閃，新婚夫婦黃翠如蕭正楠尋晚就上載咗兩張人樣都無嘅生活照。蕭正楠嘅照片影住一鍋胡椒豬肚雞煲並寫到「情人節大餐」。
而翠如嘅照片就影住二人手指尾勾住小小玫瑰花，雖然兩個人嘅照片樣都無，但已經足以感受到二人幸福嘅新婚生活，平平淡淡過情人節一樣浪漫。
