黃子華宣布棟篤笑騷後收咪,網民:「心都碎了!」

黃子華宣布棟篤笑騷後收咪,網民:「心都碎了!」

黃子華將於7月開棟篤笑《金盤啷口》,門票都未開賣就已經掀起搶飛熱潮,粉絲周圍撲飛,真係一票難求啊!不過⋯黃子華就公布一件令人心碎嘅消息,今次《金盤啷口》棟篤笑後,黃子華就會收咪了。

By COSMO

繼2014年嘅《唔黐線唔正常》、2010年嘅《娛樂圈血肉史2》同2012年嘅《洗燥》後,今次係黃子華第四次喺紅館開棟篤笑!而今次《金盤啷口》,主要係講香港人香港事,例如講性、職業、人情,因為係講香港事,所以都唔會搞巡迴,外地粉絲又要哭了。

黃子華喺facebook上載短片,親自交待收咪傳聞。佢出POST:「唔好意思,不厭其煩,最緊要清楚。」

短片講到:「其實《金盤啷口》唔係一個SHOW名,佢係一個真正嘅階段。原本我哋係想宣布,呢一個係黃子華最後一個棟篤笑,但係我團隊就認為太決斷喇,我甚至諗過好似Michael Jackson咁用this is it,不過怕俾人鬧喇,太凌厲喇。」

「所以就用多年前改落嘅名,《金盤啷口》,無錯,呢個就係小弟原則上最後一個棟篤笑。」

網民睇到條片都紛紛留言轉發,「好想喊」、「作為你的鐵粉,會支持你」、「今晚我真的失眠了」、「好唔捨得啊」。

不過黃子華之前就有講過:「我又唔係死,又唔係退休。我唔係封咪,只係收咪,亦唔係退休,只係唔做。」

對於點解會收咪,黃子華就話唔可以三言兩語講到俾大家聽,要到時入場慢慢解釋,所以原因會喺騷入面講,到時可能同觀眾傾下偈。咁粉絲們真係要更加出力去買飛喇!

LOAD MORE