feature

成日亂諗野?4招助你掃走雜念

成日亂諗野?4招助你掃走雜念

有時係咪覺得諗唔到嘢,個腦loop嚟loop去都係啲諗嚟都於事無補嘅人、事?呢啲廢物塞爆咗你嘅思想空間,搞到新鮮嘢入唔到嚟,一定要決心清咗佢!

by juju

1. 斷捨離咗啲實物先:

呢啲嘢映入眼簾,係影響到思想空間架,you are what you see,所以如果屋企有啲咩係會刺激、導向你去諗起一啲無謂嘢,就清走佢,俾個腦休息下,尤其是你想執嘢好耐,但又拖咗好耐,呢個未完成嘅任務會一直拖住你後腿,整到你成日心掛掛。

2. 寫低佢:

唔好乜都靠個腦去記,搵啲小幫手幫輕下,例如有咩閃過嘅idea,搵紙筆/手機寫低佢;約咗咩人、有咩行程,用記事簿記低佢,唔好一味迫個腦要乜都記住晒,騰返啲空位出嚟做其他更有需要嘅嘢。

3. 限制資訊輸入:

資料太雜亂無章都會影響思維,包括你閱讀嘅news、睇嘅電視、聽嘅音樂、同人傾嘅內容、去咩地方睇到/聽到啲乜等等,好多時啲資訊係喺無意識間入咗腦,要隔走無營養嘅資訊,可以由unsubscribe/unfollow一啲已經唔啱用、無質素嘅blog、page、channel、網站開始,分清楚邊啲嘢關事,邊啲嘢唔關事;有事需要問人意見,諗清楚個對象係咪幫到你,唔好因為自己又亂又急而係人都問,到頭來搞到自己仲亂。

4. 放手:

過去咗嘅人事物,最容易塞住腦袋,其中犯錯嘅事、錯過咗嘅機會、離開咗嘅人、傷過自己嘅人、俾自己傷過嘅人等,都最易令人耿耿於懷,難以向前行。放開唔係一朝一夕,但要話俾自己知:「會過去嘅!」然後俾時間幫你,有一日,呢啲過去你仍然會記得,但已經唔會再阻住你過好目前嘅生活。

LOAD MORE