feature

瀕臨分手邊緣?4招製造小浪漫抓住男友心

瀕臨分手邊緣?4招製造小浪漫抓住男友心

都市人好忙,忙到連拍拖都無時間,然後感情逐漸變淡。有時忙到,真係成個星期都無得見,夾到一齊食餐飯已經偷笑,有時出到嚟已經攰到無晒表情,但其實只要有心,都仲可以自製好多小浪漫嘅!

by juju

仲想維繫呢段感情嘅話,就要比啲力,去製造小浪漫氹下男朋友開心喇。

1. 拍小拖:

雖然工作、家庭可能仲有好多嘢令人周身煩惱,頂多只可以同另一半食個快晏、趕頭趕命咁一齊衝去買啲嘢,然後又匆匆趕返去做嘢/休息,但都唔好忘記呢個都係「拍拖時間」、「拍拖節目」嚟, 都可以開開心心咁去珍惜,唔使等下下要有成一日半日對住先叫做拍拖嘅。

2. 一齊搭車:

如果大家公勤嘅路線有幾個站係重疊嘅,時間又夾到,不妨約埋一齊搭(但如果要互等好耐、會搞到忟就唔好喇),其實個feel有少少回到少年時咁,搵窿搵罅都係為咗見多幾面,都幾sweet架!

3. Send小短訊:

一句關心、一張會令佢笑嘅無聊cap圖,都係小浪漫嚟,起碼大家互相知道對方諗緊乜、做緊乜,心裏有對方。

4. 發掘共同嗜好:

如果搵到呢樣嘢出嚟,就可以大家一齊玩,一齊開心,就算暫時未搵到,都要互相鼓勵大家做自己喜歡嘅事,正所謂「你快樂所以我快樂」,互相為對方設想,兩個人就幾時都咁開心啦!

LOAD MORE