女生Body Check之禁忌！做婦科檢查不要犯的5個疏忽

大個女自從有性生活開始或年紀有返咁上下，都應該知道要定期做body check婦科檢查，既然去到，就唔好因為怕醜而求求其其，要認真關心自己嘅身體喔！

做body check婦科檢查有幾件事要留意的，女生們不要hea過啊。

1. 唔誠實

關於性生活、藥物等方面嘅事，唔好隱暪醫生，要坦白回答佢嘅問題，因為呢啲資料會直接影響佢對你身體情況嘅判斷、決定俾咩治療你，最終得益或受罪嘅都係你嘅身體。

2. 有嘢唔問

有咩疑惑唔好擺喺心，可能我哋自己覺得尷尬或白痴，但其實醫生嘅角色就係幫人解決疑難，一個好嘅醫生會歡迎你嘅坦誠同信任。

3. 唔記得上次幾時嚟經

呢個資料每個婦科醫生都基本要知，你唔記得或好唔肯定，都會令醫生好難做嘢，所以平時記得每個月喺記事簿度mark低，同埋去覆診前check一check先，唔使到時先至摷記事簿或估估下。

4. 唔好過度緊張

入到去要做啲身體檢查，如果你太緊張，會影響過程嘅順利度，所以最好盡量準備輕鬆正面嘅心情，例如喺診所外面等候時，帶本書去睇或聽下歌，relax一下。

5. 唔好唔覆診

如果醫生叫你覆診，或叫你早啲預約下次見面，就唔好拖、唔好懶，幾時做多啲都係穩陣嘅。