feature

不想有異味飄出來!5個方法助你趕走體臭

不想有異味飄出來!5個方法助你趕走體臭

夏天又嚟喇,身體容易出汗,有時難免俾啲異味(體臭)走咗出嚟,為免尷尬,就要盡量做好防味操施!

by juju

1. 定期除毛:

冬天我哋可能會疏懶啲,但係夏天就唔可以喇,定期適當修剪腋下毛或特別多毛髮嘅部位,咁就無咁易俾細菌滋生。沖涼時記得要抹乾呢啲位,臨瞓搽止汗劑。

2. 著通爽質地嘅衫:

盡量揀天然纖維物料嘅衣物,唔好太緊身焗住成身汗,俾皮膚足夠嘅唞氣空間。

3. 注意鞋襪:

鞋襪最易儲住啲異味,唔係著住都會自己散發出異味出嚟!所以要定期檢查下有無怪味,有就洗洗佢,消毒下,攞去曬下;如果本身屬於大汗腳,平時最好帶多對襪喺需要時更換。

4. 注意體重:

某啲位肥胖嘅話,會好似BB仔咁,有啲位置形成摺埋嘅情況,沖涼時記得清潔呢啲位,抹乾,保持乾爽。另外適當減重對處理體臭同個人健康都係有益嘅。

5. 用吸汗護墊:

坊間有呢種產品賣,雖然幫唔到減少汗水,但可以護住你件衫,唔使俾人見到件衫腋下個位出現兩撻濕咗嘅陰影;而且你可以隨時入洗手間更換,保持乾爽。

*除咗腋下、大腿內側呢啲位,女生下面喺夏天都有可能因為出汗而多咗啲味,改善方法都係差唔多,多著棉質內褲、保持乾爽、適當除毛,經期嚟時換護墊換得頻密啲,有其他問題就當然要睇醫生啦。

LOAD MORE