真係好痛！6個方法預防尿道炎返發

唔少女生都有過尿道炎嘅煩惱，又痛又唔舒服，有事當然要即刻睇醫生，唔拖得，但無事時，都唔可以由得佢，應該喺生活上照顧好自己，盡量減低返發嘅機會。

1. 飲足夠水份：

飲夠水可以幫手沖走身體裏面嘅廢物、細菌，保持身體水潤，對預防尿道炎好有幫助。有啲女生一日真係飲好少水，掛住做嘢就乜都唔記得，嗱，盡量要自己每一餐都飲一杯水，或者食咗零食都飲返半杯水，咁起碼唔會連續幾個鐘都無滴水落肚先啦！

2. 唔好忍尿：

呢個壞習慣真係要改！你唔去，啲菌就容易困住喺膀胱度滋長，增加尿道炎發生嘅風險。唔好懶，見到有乾淨廁所，就去咗先！

3. 保持乾淨：

記得記得記得，去完廁所抹妹妹時，係由前抹向後，因為女生嘅尿道口同肛門位置較近，接觸到細菌嘅機會都高咗。而平時沖涼，沖花灑都係記得由前面沖向後面！

4. 多著鬆身褲：

近年好興著skinny褲，尤其係fashion sportwear，但最好都係運動時著，出咗一身汗就換返通爽嘅鬆身衫褲，一日連著幾個鐘緊身褲、尼龍物料，容易噏住啲水氣，滋生細菌。

5. 多食鹼性食物：

豆類、蜜糖、無糖yogurt、綠葉植物、cranberry、blue berry、花草茶等

6. 少食：

飯、麥、精製糖、汽水、咖啡等。