好唔想返工?3招踢走「假期後症候群」

好唔想返工?3招踢走「假期後症候群」

經過一連串節日、長假期,見朋友、去旅行、吃玩hea瞓大戰一輪過後,要回歸日常嘅生活,真心唔係一件容易嘅事。

by juju

要重新回到軌道,就可以靠呢幾招,希望呢幾個過渡方法幫到你(真心)!

假期後症候群

1. 接受自己有啲憂鬱: 

有研究指出,假期後嘅負面情緒同放假時作息時間大大改變有好大關係,我哋一放假就會夜瞓(甚至唔瞓)、狂食、早餐變lunch(甚至下午茶)…生理時鐘亂咗,情況就好似有jet-lag咁!

於是我哋一返工/返學,會有眼瞓、好攰、集中唔到精神、無胃口、記憶力未返晒嚟、輪輪盡盡等癥候出現,尤其是返工第一日。知道自己會喺咁嘅狀態,第一日最好先完成一啲較簡單嘅任務,減低出錯機會,盡量諗多啲正面嘢,唔好俾自己覺得太慘。

2. 早少少返工:

你正正就係唔想返工,但係又被建議早少少返工!點解呢?早少少起身出門、喺公司仲靜靜哋時,沖杯茶,諗下今日工作日程、對自己有咩期望,盡量避免趕頭趕命、好似頭頭碰著黑咁開展一日,乜都順利啲,就會無咁難受。

之前一晚最好諗定著邊套衫、執好手袋、make sure自己有帶銀包、鎖匙、八逹通、員工證等,等自己可以安心瞓覺。

3. 明白同事們都有相同「問題」:

喺回歸日常生活嘅頭一星期,當其他同事都有啲「唔妥」係屬於正常,因為其實大家都share緊同一堆「癥狀」,希望咁樣可以多啲體諒,少啲磨擦。大家亦可以為工作增添一啲樂趣,例如lunch time時一齊食好啲,做到悶時講下假期趣事,時間會過得快啲!

LOAD MORE