手殘男友必學！7招令女友瞬間變女神

除咗抱怨男朋友顧住打機同唔識氹返自己之外，其中一樣成日聽到女仔投訴嘅一定係：「男朋友影都我好醜樣呀！」張相出到嚟又暗又唔對焦都算，但影到女朋友「矮肥短」真係死罪！小編明白各位男朋友其實已經盡咗力，但就可能有啲拍攝小貼士你哋從來都唔知先會咁力不從心！就算你有一個手殘男朋友定你就係嗰位手殘男朋友都唔緊要，等小編話你知點樣影先可以令女友瞬間變女神！

手殘男友必學拍攝技巧1： 低角度拍攝

呢個「阿媽係女人」嘅小貼士相信你一定聽過，但係低角度拍攝究竟要有幾低呢？好多時明明已經低炒咗但點解都係影唔到長腿嘅？精髓係在於除咗係放低啲個電話或者相機去影之外，其實好多時都需要攝影師半蹲甚至踎低去幫對方影相。如果你好懶唔想踎低唔想郁嘅話，就未必可以影到40吋長腿嘅效果！

拍攝嘅對象唔一定要企喺度，就算坐喺度再加低炒技巧都一樣可以影出長腿！

手殘男友必學拍攝技巧2：腳貼照片底部

如果想影長腿，除咗低炒之外，其實仲有另一個技巧，就係將攝影對象嘅腳貼住相底咁影！當張相無咁多地面嘅時候，腳嘅比例就會感覺上長咗！

低炒加埋呢個貼相底影嘅skills，雙管齊吓，包你可以幫女神BB或者女朋友影出米八嘅視覺！

手殘男友必學拍攝技巧3：製造空間感

將要影嘅對象放喺相嘅中間，周圍要留返空間，咁就可以避免逼爆mon嘅情況！好多時如果太大頭都會影到女朋友好腫脹同有肉，咁就唔靚啦！

無論係半身照定全身照，空間感其實都好緊要！

手殘男友必學拍攝技巧4：回眸一笑

如果點影個樣都唔自然，不如試吓回眸一笑。叫對方擰轉面先然後再數一二三叫佢擰返過嚟笑，嘗試捕捉最sweet最自然嗰一下！

永遠諗唔到咩pose嘅時候，回眸一笑係點都會work㗎，所以手殘男友或者新手男友記住學啦！

手殘男友必學拍攝技巧5：唔望鏡頭更自然

唔望鏡頭嘅相係最自然，但呢個技巧除咗攝影師要學之外，model都要配合吓。所以唔可以淨係旨意男朋友，姊妹們都要交吓戲，最緊要係個樣唔好尷尬，做返自己就可以啦！

其中一個扮自然得嚟簡單，簡單得嚟唔造作嘅pose就係撥頭髮或者翹頭髮，下次可以試吓呀！

手殘男友必學拍攝技巧6：捕捉得意搞鬼神態

想影靚相唔一定要張張女神pose嘅！有陣時啲得意搞鬼表情出到嚟其實都好得意㗎！

扮鬼扮馬嘅相除咗可以令你形象貼地啲之外，仲可以展現你得意可愛一面比其他人睇！識得整鬼臉嘅女仔更加girlfriend-able㗎呢！

終極手殘男友必學拍攝技巧7：連拍不斷拍

如果以上咁多點你都拿捏唔到都唔緊要！！！呢招實冇死，當對方擺pose嘅時候，你幫佢用連拍模式影相，捕捉哂咁多秒實無死！

呢個技巧煩就煩在之後揀相，有咁多張相之後一定有排揀同delete！